Buxoroda “Sanoatqurilishbank” anomal sovuq sharoitida ko‘chada ishlayotgan obodonlashtirish xodimlariga issiq qahva tarqatdi

So‘nggi kunlarda yurtimizda kuzatilayotgan anomal sovuq ob-havo sharoitida ham Buxoro shahar obodonlashtirish bosh boshqarmasi xodimlari odatdagidek ko‘chalarni tozalash bilan band, – deya xabar qilmoqda Buxoro viloyati hokimligi.

Bugun erta tongdan ham tashkilot ishchilari shahardagi ko‘p qavatli uylar, piyodalar yo‘laklari va transport qatnovidagi yo‘llarni tozalash ishlari olib borishmoqda.

Shunday paytda, o‘z ishlarini vijdonan bajarayotgan boshqarma xodimlari yoniga kelib, hech bo‘lmaganda, samimiy minnatdorlik bildirish – ularning ko‘nglini tog‘day ko‘tarishi bor gap.

Aynan shu maqsadda “Sanoatqurilishbank” Buxoro viloyat filiali tomonidan xayrli tashabbus ko‘rsatildi. Bank mas’ullari obodonlashtirish xodimlari faoliyat olib borayotgan manzillarda bo‘lishib, ularga yegulik va issiq qahva tarqatishdi.

To‘g‘ri, bu juda katta ish emasdir, balki. Ammo shunday sovuq kunlarda ko‘rsatilayotgan bunday samimiy e’tirof ta’bir joiz bo‘lsa, odamgarchilikning yorqin ifodasidir.

Chunki ba’zida, ayniqsa, bugungidek sovuq kunlarda o‘zimiz yashayotgan xonadon yon-atrofini tozalashga botinmaymiz. Shunday emasmi?