Buxoroda ertadan boshlab 16-yanvargacha “Afrosiyob” poyezdlari yurmaydi. Sotib olingan chiptalar nima bo‘ladi?

Joriy yilning 13-, 14-, 15-yanvar kunlari 766/765-sonli “Toshkent – Buxoro – Toshkent” yo‘nalishidagi “Afrosiyob” yuqori tezlikda harakatlanuvchi elektropoyezdlari qatnovlari bekor qilinadi. Bu haqda “O‘ztemiryo‘lyo‘lovchi” AJ xabar bermoqda.

Buning asosiy sababi esa mamlakatimiz bo‘ylab kuzatilayotgan anomal sovuq ob-havo sharoitida yo‘lovchi poyezdlar harakat xavfsizligini ta’minlash va yo‘lovchilarni o‘z manzillariga yetkazish davomida noqulayliklar kelib chiqishini oldini olishdir.

Xarid qilingan chiptalarni temir yo‘l chiptaxonalarida, elektron tarzda xarid qilingan chiptalarni https://chipta.railway.uz saytida qaytarishingiz mumkin. Chipta 100% qiymatda qaytariladi.

Shuningdek, harakatdagi muqobil yo‘lovchi poyezdlaridan ham foydalanishingiz mumkin:
12-sonli “Toshkent – Buxoro” (“Sharq” poyezdi);
56-sonli “Toshkent – Buxoro – Xiva”;
58-sonli “Toshkent – Buxoro – Shovot”;
72-sonli “Toshkent – Buxoro – Olot”;
125-sonli “Andijon – Toshkent – Buxoro – Xiva”.