Buxoro shahrida 4 yulduzli “Turon city plaza” mehmonxonasi ochildi

Kecha, 26-yanvar kuni 4 yulduzli mehmonxona foydalanishga topshirildi. Bu haqda viloyat hokimligi xabar qilmoqda.

E‘tiborlisi, mazkur mehmonxona yangi qurilayotgan “Bukhara city” majmuasida foydalanishga topshirilgan ilk inshootdir.

Feruz Ergashev rahbarligidagi “Big Large” MChJ tomonidan bunyod etilgan mehmonxonaning loyiha qiymati 85 mlrd so‘mni tashkil etadi. Uning 50 mlrd so‘mi tadbirkorning o‘z mablag‘i, 35 mlrd so‘mi esa bank krediti hisoblanadi.

Turon city plaza 105 xonadan iborat bo‘lib, 200 o‘ringa mo‘ljallangan. Shuningdek, bu yerda 51 ta yangi ish o‘rni yaratilgan. Ishchi-xodimlarning aksariyat qismi turizm texnikumi bitiruvchilari.

Musiqiy favvora, restoran, zamonaviy SPA markazi, fitnes klub, ochiq va yopiq suv havzalari, “fitobar” har bir mehmonning bo‘sh vaqti mazmunli o‘tishini ta’minlaydi.

Ma’lumot uchun, “Bukhara City” majmuasi hududida aholiga yuqori darajada savdo va xizmat ko‘rsatishning o‘ziga xos namunasi bo‘lishi kutilayotgan 1 717 ta savdo do‘koni, 36 ta umumiy ovqatlanish, shuningdek, 100 dan ortiq maishiy va texnik xizmat ko‘rsatuvchi shaxobcha, avia va temir yo‘l kassasi, bank filiallari, “Karvon Shopping Centre” ko‘ngilochar savdo markazi quriladi.

Ta’kidlash joizki, mehmonxonaga tutash hudduda ayni vaqtda 80 ta xonadonli (9 qavatli), 49 ta xonadonli (9 qavatli), 35 ta xonadonli (7 qavatli), 64 ta xonadonli (9 qavatli), 2 ta 128 xonadon (9 qavatli) dan iborat zamonaviy turar-joy binolarining qurilish ishlari yakunlanish arafasida.