Cho‘ntagimda nos bilan namoz o‘qisam bo‘ladimi?

Savol: Cho‘ntagimda nos bilan namoz o‘qisam namozim to‘g‘ri bo‘ladimi?

Javob: Namozxonni namozi to‘g‘ri bo‘lishi uchun uning badani va kiyimi pok bo‘lishligi shart. Agar uni kiyimi yoki badaniga dirham miqdoridan ziyoda najosati g‘aliza (og‘ir najosat) tekkan bo‘lsa, yoki kiyimining va badanning to‘rtdan biridan ko‘prog‘iga najosati xafiyfa (yengil najosat) tekkan bo‘lsa o‘shanda namozxonning namozi durust bo‘lmaydi. Xuddi shu hukm namozxonning cho‘ntagidagi narsaga ham tegishlidir. Ya’ni namozxonning cho‘ntagidagi nopok narsa najosati g‘aliza bo‘lib, u bir dirhamdan ziyoda bo‘lsa yoki najosati xafifa bo‘lib to‘rtdan birdan ziyoda bo‘lsa namozi durust bo‘lmaydi. Savolda kelgan nosvoy, sigaret zohiran nopok emas. Shuning uchun namozxon cho‘ntagida mazkur narsalar bilan namoz o‘qisa uning namozi durust bo‘ladi. Ammo bu musulmon kishiga bunday narsalarni iste’mol qilish halol bo‘ladi degani emas. Vallohu a’lam.

Manba: O‘zbekiston musulmonlari idorasi Fatvo hay’ati.