Shuhrat Aliyev Namangan IIB boshlig‘i lavozimiga tayinlandi

2023-yilning 23-fevral kuni Ichki ishlar vaziri general-leytenant Po‘lat Bobojonov tomonidan Namangan viloyatida ichki ishlar organlarining xizmat faoliyatiga oid tezkor yig‘ilish o‘tkazildi.

Tadbirda Namangan viloyati hokimi Shavkatjon Abdurazzoqov, viloyat hamda shahar va tuman sektor rahbarlari va huquqni muhofaza qiluvchi organlarining mutasaddilari ishtirok etdilar.

Jarayonda hisobot davrida jinoyatchilikka qarshi kurash masalalari hamda jamoat xavfsizligi konsepsiyasida belgilangan vazifalarning ijrosi muhokama etildi.

Shuningdek, yig‘ilishda huquqbuzarliklarni barvaqt oldini olish, «Xavfsiz va ravon yo‘l» dasturi doirasida amalga oshirilgan ishlar, jamoat xavfsizligini ta’minlash chora-tadbirlari, xizmat intizomi va qonuniylikka rioya etilishi hamda boshqa yo‘nalishlarda amalga oshirilgan ishlar tanqidiy tahlil qilindi.

Viloyat hududida sodir etilayotgan jinoyatlarning tahlilidan kelib chiqib, kriminogen vaziyatni yanada barqarorlashtirish maqsadida har bir tuman-shahar IIB boshliqlari va mazkur hududlarga biriktirilgan viloyat IIB rahbar xodimlari tomonidan mahallalarni jinoyatchilikdan holi hududlarga aylantirish, aholini rozi qilish, ularning murojaatlarini yechimiga e’tibor qaratish, mavjud muammolarni aniqlash va ularni bartaraf etish bo‘yicha vazifalar belgilandi.

Yig‘ilishda tashkiliy masalalar ko‘rildi. O‘zbekiston Respublikasi Prezidentining qaroriga asosan polkovnik Rahmonov Shavkat Navruzovich O‘zbekiston Respublikasi Ichki ishlar vazirining birinchi o‘rinbosari – Tezkor-qidiruv departamenti boshlig‘i lavozimiga tayinlanganligi e’lon qilindi. Ichki ishlar vazirining buyrug‘i bilan Namangan viloyati Ichki ishlar boshqarmasi boshlig‘i lavozimiga polkovnik Aliyev Shuhrat Hasanovich tayinlandi.

Tadbirda ko‘tarilgan muammolar va yechimini kutayotgan masalalar bo‘yicha soha faxriylari va mutaxassislar so‘zga chiqib, taklif hamda mulohazalar bildirdilar.

Eslatib o‘tamiz, Shuhrat Aliyev bunga qadar Buxoro IIB boshlig‘i sifatida faoliyat ko‘rsatib kelayotgandi.