Olingan kreditni muddatidan oldin to‘lasam, qolgan kunlar uchun foizlarni to‘lashim shartmi?

Savol: Men bankdan iste’mol krediti olganman. To‘lov grafigi bo‘yicha men kreditni 2023-yilning iyul oyida to‘lab bo‘lishim kerak. Meni savolim, agar men 2023-yilning iyul oyini kutib o‘tirmasdan, hozir qolgan qarzdorligimni hammasini to‘lab yuborsam, iyul oyigacha bo‘lgan davr uchun ham foizlarni qo‘shib to‘lashim kerakmi yoki muddatidan oldin to‘lov qilinsa, qolgan oylarga foiz hisoblanmaydimi ?

Javob: “Iste’mol krediti to‘g‘risida” gi qonunining 16-moddasiga asosan, iste’molchi olingan iste’mol krediti summasini qaytarishni va mazkur kredit bo‘yicha hisoblangan foizlarni to‘lashni muddatidan ilgari amalga oshirishga haqli. Bunday holda iste’molchi faqat iste’mol kreditidan haqiqatda foydalanilgan muddat uchun foizlar to‘laydi deb ko‘rsatilgan.

Ya’ni, agar Siz iste’mol kreditini 3 yilga olgan bo‘lsangizu lekin kreditni 3 yil emas bir yilda hammasini to‘lab yuborsangiz qolgan 2 yil uchun Sizga foiz hisoblanmaydi. Kredit uchun foizlar faqat Siz undan foydalangan vaqtingiz uchun xisoblanadi xolos.

Masalan 3 yillik shartnoma bilan 10 000 000 so‘m kredit olgansiz, deylik. Siz uni 3 yilda foizlari bilan 13 000 000 qilib qaytarishingiz kerak. Lekin, Siz qarzni 3 yilda emas, 1 yilda to‘lab yuborsangiz, 10 000 000 so‘mni 13 000 000 so‘m qilib emas, 11 000 000 so‘m to‘lab hammasini yopib yuborishingiz mumkin.

Asos: O‘zbekiston Respublikasi Prezidenti tomonidan 2006-yilning 6-may kuni imzolagan “Iste’mol krediti to‘g‘risida” gi O‘zbekiston Respublikasi qonuni.

Manba: Mahallabay ishlash va tadbirkorlikni rivojlantirish agentligining Buxoro viloyati boshqarmasi.