Jondor tumanida maktab ta’miri paytida katta miqdordagi talon-tarojliklar fosh bo‘ldi

Buxoro viloyati Jondor tumanidagi maktab binosini ta’mirlashda 140 million so‘m talon-toroj qilindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti axborot xizmati xabar berdi.

Ma’lum qilinishicha, departamentning Jondor tuman bo‘limi tomonidan tumandagi umumiy o‘rta ta’lim maktabida amalga oshirilgan ta’mirlash ishlari yuzasidan tergovga qadar tekshiruv o‘tkazilgan. Unda pudratchi korxona rahbari va boshqalar maktab binosiga smeta loyiha hujjatlarida belgilangan tabiiy gaz hamda qattiq yoqilg‘iga mo‘ljallangan isitish qozoni o‘rniga boshqa rusumdagi isitish qozonlarini o‘rnatgan.

Shuningdek, «LED» yoritish chiroqlari o‘rniga arzon narxdagi boshqa yoritish chiroqlarini o‘rnatib, 140 million so‘m byudjet mablag‘larini o‘zlashtirish yo‘li bilan talon-toroj qilgani aniqlangan. Mazkur holat yuzasidan jamiyat rahbari va boshqalarga nisbatan Jinoyat kodeksining 167-moddasi (Talon-taroj qilish) bilan jinoyat ishi qo‘zg‘atilib, tergov harakatlari o‘tkazilmoqda.