Buxoroliklar orasida “vokzal” deb yuritiladigan shahardagi markaziy hududdagi tunnel qurilishi qachon yakunlanadi?

Keyingi yillarda Buxoro shahri katta qurilish maydoniga aylandi. Hududda ijtimoiy va ishlab chaqarish obyektlari qurilmoqda, zamonaviy turar joylar barpo etilmoqda, yo‘llar kengaytirilmoqda. Bularning barchasi aholiga qulaylik yaratish, ularning hayot tarzini yanada yaxshilashga qaratilgan. E’tiborli jihati, bunday bunyodkorliklar shiddati susaygani yo‘q. Aksincha, jadal tus olmoqda.

Ayni payda Buxoro viloyat hokimi Botir Zaripov shaharda amalga oshirilayotgan ana shunday qurilish-bunyodkorlik, shuningdek, qish mavsumiga tayyorgarlik ishlari bilan tanishdi. bu haqda viloyat hokimligi matbuot xizmati xabar qildi.

Su yerning o‘zida mavjud muammolar mutasaddilar ishtirokida muhokama qilinib, ularni hal etish bo‘yicha vazifalar belgilanmoqda.

Dastlab viloyat rahbari xalq tilida «Vokzal chorrahasi» nomi bilan ataladigan hududda barpo etilayotgan piyodalar yer osti o‘tish yo‘lida bajarilayotgan qurilish ishlarini ko‘zdan kechirdi. Qayd etish joizki, mazkur hudud avvaldan transport vositalari va piyodalar serqatnov joy hisoblanadi. Shu bois bir paytlar bu yerda piyodalar yer osti o‘tish yo‘li qurilgan. Yillar o‘tib, yer osti suvi sathi ko‘tarilishi natijasida bu yo‘ldan foydalanish imkoni bo‘lmagan va u ko‘mib yuborilgan. Aholi bilan o‘tkazilgan uchrashuv va muloqotlardan so‘ng mazkur piyodalar o‘tish yo‘lini qayta tiklashga qaror qilingandi.

Shunga ko‘ra hozirda Buxoro yo‘llardan muntazam foydalanish unitar korxonasi bunyodkorlari tomonidan uzunligi 38,5 metr, eni 4,5 metr, bo‘yi 2,5 metrdan iborat yer osti o‘tish yo‘li zamonaviy tarzda qurilmoqda.

Botir Zaripov yer osti yo‘li qurilishi bilan tanishdi. Uni sifatli yakunlash, atrofini obodonlashtirish yuzasidan mas’ullarga topshiriq va ko‘rsatmalar berdi.

Ta’kidlash o‘rinliki, mazkur hudud serqatnovligi tufayli yo‘l transport hodisalari soni ortishi ehtimoli ham yuqori edi. Loyiha yo‘l harakati qatnashchilari xavfsizligini ta’minlashga qaratilgani bilan ham ahamiyatlidir.

Mazkur yer osti piyodalar o‘tish yo‘li joriy hafta yakuniga qadar foydalanishga topshirilishi ko‘zda tutilgan.