“Hosilga kirgan” ko‘knorilar bevaqt uzildi

“Qoradori-2024” tadbirining I bosqichida koʻknori yetishtirish bilan bogʻliq yana bir jinoiy holat bartaraf etildi.

Surxondaryo viloyatining Denov tumanida boʻlib oʻtgan tezkor tadbirda Buxoro va Surxondaryo viloyati bojxona boshqarmalarining Kontrabandaga qarshi kurash boʻlimi tezkor vakillari, Ichki ishlar boshqarmasi hamda Davlat xavfsizlik xizmati xodimlarining hamkorligi besamar ketmadi.

Unda oldindan olingan maʼlumotlar asosida harakatlangan tezkor guruh ishtirokchilari fuqaro N. R. ning yashash xonadonini xolislar ishtirokida koʻzdan kechirgan vaqtda ekin ekish uchun belgilangan yer maydonida koʻknori hamda kannabis oʻsimliklarini parvarishlab kelayotganligini aniqlashdi.

IIB ning Ekspert kriminalistika markazi xulosasida ham giyohvandlik oʻsimligi ekanligi tasdiqlangan 12 tup kannabis va 317 tup koʻknori oʻsimliklari barchasi ashyoviy dalil sifatida tegishli qonunchilik asosida saqlovga olindi.

Holat yuzasidan esa ayni vaqtda bojxona organlari tomonidan tergovga qadar surishtiruv harakatlari olib borilmoqda.