Buxoro viloyati Bojxona boshqarmasining yangi tayinlangan rahbari tadbirkorlar bilan uchrashdi

Bojxona organlari va tadbirkorlik subyektlari faoliyatining o‘zaro hamkorligida ishlab chiqarish tarmoqlari kengayib, mamlakatning eksport salmog‘i sekin-astalik bilan o‘sib bormoqda. Bunda Bojxona qo‘mitasi va uning hududiy boshqarmalari tomonidan tadbirkorlik subyektlarini qo‘llab-quvvatlash, ularga amaliy yordam ko‘rsatish bo‘yicha davomli tarzda tashkil etilayotgan ochiq muloqotlar soha rivoji uchun muhim ahamiyat kasb etmoqda.

Mavzuni Buxoro viloyati bojxona boshqarmasi misolida davom ettiradigan bo‘lsak, yuqoridagi fikrimizning yaqqol namunasi sifatida viloyat hududidagi tadbirkorlar hamda tashqi iqtisodiy faoliyat qatnashchilar bilan boshqarma boshlig‘i Baxtiyor Muratovning ochiq muloqot tarzidagi uchrashuvini aytishimiz mumkin. Bu haqda boshqarma Matbuot xizmati xabar qilmoqda.

Ochiq muloqot avvalida, bojxona organlari tomonidan tadbirkorlik subyektlari va eksportni rag‘batlantirish maqsadida amaliyotga joriy etilgan yangiliklar soha mutaxassislari tomonidan yig‘ilganlarga batafsil tushuntirildi.

Xususan, “Eksport uch qadamda” tizimi va “Bojxona hududida qayta ishlash” bojxona rejimi samaradorligi yuzasidan tadbirkorlarga muhim tavsiyalar berilib, mavzu yuzasidan ularni qiziqtirgan savollarga javob qaytarildi.

50 dan ortiq tadbirkorlik subyektlarini bir manzilga jamlagan uchrashuvda soha yuzasidan istiqbolli loyihalar keng muhokama etilishi barobarida, tadbirkorlarning muammolari tinglanib, ularga amaliy ko‘mak berishda aniq yo‘nalishlar belgilab olindi.

E’tiborlisi, ochiq muloqot jarayonida bir nechta ishtirokchilarining bojxona sohasiga oid muammolari shu yerning o‘zida ijobiy yechim topishiga erishildi.

Ma’lumot uchun aytadigan bo‘lsak, mavzu doirasidagi uchrashuvlarni sayyor tartibda ham amalga oshirilishi belgilangan bo‘lib, navbatdagi ochiq muloqot viloyatning G‘ijduvon tumanida tashkil etilishi rejalashtirilgan.