Bugun Buxoroda maktab bitiruvchilari uchun so‘nggi qo‘ng‘iroq yangraydi

Xususan, aynan shu kuni viloyatimizdagi 578 ta maktabning 22 ming 171 nafar 11-sinf bitiruvchilari qadrdon maktablari, mehribon ustozlari bilan xayrlashadilar.

Ularning 657 nafari o‘qishni oltin va kumush medal bilan yakunlamoqda.

Bu nafaqat o‘quvchilar, balki ota-onalar, ustoz-murabbiylar uchun ham g‘oyat quvonchli va hayajonli voqeadir.

O‘z navbatida bugun, 24-may kuni viloyatimizdagi barcha umumta’lim maktablarida “Ilm – eng buyuk sharaf!” shiori ostida “So‘nggi qo‘ng‘iroq” tadbirlari bo‘lib o‘tadi.

Unda barcha darajadagi hokimlar, yirik korxona va tashkilot rahbarlari, oliy ta’lim muassasalari rektorlari, ziyolilar, yozuvchi va shoirlar hamda jamoatchilik vakillari ishtirok etadilar.

Tadbirlarda O‘zbekiston Respublikasi Prezidenti Shavkat Mirziyoyevning mamlakatimiz maktablarining bitiruvchilariga tabrigi tantanali o‘qib eshittiriladi.

Fursatdan foydalanib, o‘z bilim va iste’dodini Vatanimiz va xalqimizga munosib farzand bo‘lishdek olijanob maqsadlarga sarflashga chog‘lanib turgan barcha bitiruvchilarga oq yo‘l tilaymiz!