Xalqaro O‘zbeklar kuni ta’sis etiladi

Butun dunyoda ushbu kun elchixonalar orqali nishonlanadi

O‘zbekiston prezidenti Shavkat Mirziyoyev tomonidan Xalqaro O‘zbeklar kunini belgilash taklifi ma’qullandi. Xorijdagi vatandoshlarning bu iltimosini AQShdagi O‘zbekiston elchisi Furqat Sidiqov davlat rahbarining Tashqi ishlar vazirligi hamda xorijdagi diplomatik vakolatxonalar faoliyatiga bag‘ishlangan yig‘ilishida prezidentga yetkazdi.

Yig‘ilishda davlat rahbari AQShda, xususan Nyu-York va Vashington shaharlarida mahalla va choyxonalar tashkil etish zarurligini ta’kidladi. Prezidentning so‘zlariga ko‘ra, bu loyihalar vatandoshlar uchun qulay makon yaratib, ularning g‘urur-iftixorini oshiradi.

Furqat Sidiqovning qayd etishicha, u O‘zbekiston elchisi sifatida oxirgi 2 yil ichida AQSh rahbarlari va kongressmenlar bilan samarali muloqot olib borib, 2 000 ta ish o‘rinlari yaratildi, shuningdek, to‘rtta savdo uyi ochildi. Shu bilan birga, Xalqaro O‘zbeklar kunini butun dunyoda elchixonalar orqali nishonlash rejalashtirilmoqda.

Bundan tashqari, F. Sidiqov Amerika kompaniyalari O‘zbekistonning IT-parklari va IT-kompaniyalari bilan hamkorlik qilishga qiziqish bildirayotganini ma’lum qildi. Ushbu tashabbus xorijdagi vatandoshlar bilan aloqalarni mustahkamlash va O‘zbekiston madaniyatini global maydonda targ‘ib qilishga xizmat qiladi.