Buxoroda 30 mln AQSh dollari miqdoridagi xorij sarmoyasi bilan yangi zavod ish boshlamoqda

Zhongshan Material Group ishtirokida Buxoro viloyatida metallni qayta ishlashga ixtisoslashgan yangi ishlab chiqarish korxonasi ishga tushirildi. Zavod Buxoro sanoatni rivojlantirish kompleksi hududida joylashgan bo‘lib, loyiha to‘g‘ridan-to‘g‘ri xorijiy investitsiyalar hisobidan amalga oshirildi.

Alohida qayd etish o‘rinliki, loyihaning umumiy qiymati 30 million AQSh dollarini tashkil etadi. Korxonada metall materiallarni qayta ishlash hamda qurilish sohasiga mo‘ljallangan zamonaviy metall mahsulotlar ishlab chiqarish yo‘lga qo‘yilgan.

Yangi ishlab chiqarish quvvatlari, avvalo, ichki bozor ehtiyojlarini qondirishga xizmat qiladi. Shu bilan birga, import o‘rnini bosish, sanoat kooperatsiyasini kengaytirish va mahalliy ishlab chiqaruvchilar imkoniyatini oshirish asosiy maqsadlardan biri sifatida belgilangan.

Zavod ishga tushirilishi bilan hududda yangi ish o‘rinlari yaratilmoqda, bu esa aholi bandligini ta’minlashga ijobiy ta’sir ko‘rsatadi. Mutasaddilar ta’kidlashicha, bunday loyihalar Buxoro viloyatining sanoat salohiyatini kuchaytirib, investitsiyaviy jozibadorligini yanada oshiradi.

Ma’lumot uchun, Zhongshan Material Group metall materiallar, kimyoviy mahsulotlar ishlab chiqarish, import-eksport savdosi, logistika va resurslarni qayta ishlash sohalarida faoliyat yuritadi. Kompaniya tarkibida 27 ta sho‘ba korxona mavjud bo‘lib, yillik daromadi qariyb 500 million AQSh dollarini tashkil etadi.