Buxoroda xotin-qizlar uchun 70 ming AQSh dollarlik sovrin jamg‘armasiga ega shaxmat turniri o‘tkaziladi. Siz ham ro‘yxatdan o‘ting!

Xalqaro xotin-qizlar kuni munosabati bilan umumiy sovrin jamg‘armasi 70 ming AQSh dollarini tashkil etadigan “Women’s Chess Championship” IV xalqaro turniri Buxoro shahrida bo‘lib o‘tadi. Nufuzli musobaqa joriy yilning 9–15 mart kunlari tashkil etilib, unda dunyoning yetakchi ayol grossmeysterlari hamda iqtidorli shaxmatchi qizlar ishtirok etishi kutilmoqda.

Turnir Buxoroni yana bir bor xalqaro sport maydonida namoyon etib, ayollar shaxmatining rivojiga muhim hissa qo‘shadi. Musobaqada yosh va tajribali shaxmatchilar o‘zaro kuch sinashib, yuqori sovrinlar uchun bahs olib boradi.

Imtiyozlar:
— 7–18 yosh toifasidagi O‘zbekiston chempionati sovrindorlari ishtirok badalidan ozod etiladi;
— nogironligi bo‘lgan ishtirokchilar hamda 60 yoshdan oshgan faxriy shaxmatchilar uchun 50% lik chegirma joriy etiladi.

Ro‘yxatdan o‘tish muddati:
— xorijiy ishtirokchilar uchun — 25-fevralgacha;
— o‘zbekistonlik shaxmatchilar (Masters) uchun — 15-fevralgacha.
Arizalar: uzchess@inbox.ru

Shaxmat inson tafakkurini charxlaydigan eng qadimiy va nufuzli sport turlaridan biri bo‘lib, u mantiqiy fikrlash, sabr-toqat va strategik rejalashtirish ko‘nikmalarini shakllantiradi. Shaxmat bilan muntazam shug‘ullangan inson qaror qabul qilish jarayonida ancha puxta, vazmin va mulohazali bo‘lib yetishadi.

Ushbu o‘yin xotirani mustahkamlab, diqqatni jamlash qobiliyatini sezilarli darajada oshiradi. Ayniqsa, bolalar uchun shaxmat aqliy rivojlanishni jadallashtiruvchi samarali vosita hisoblanadi. Kattalar uchun esa u stressni kamaytirib, miya faoliyatini faollashtirishga xizmat qiladi.

Shaxmat insonda intizom va mas’uliyat hissini kuchaytiradi, chunki har bir yurish oldindan chuqur o‘ylashni, oqibatlarni hisobga olishni talab etadi. Bu sport turi millat va til tanlamaydi, u butun dunyo xalqlarini birlashtiradi. Shaxmat shunchaki o‘yin emas, balki insonni hayotiy qarorlar qabul qilishga o‘rgatuvchi haqiqiy hayot maktabidir.