Buxoroda ikki muhim tayinlov: vokzal va ekologiya boshqaruvida yangi rahbarlar ish boshladi

Buxoro viloyatida ikki muhim tizim — temiryo‘l infratuzilmasi hamda ekologiya yo‘nalishida yangi rahbarlar faoliyat boshladi. “Temiryo‘l vokzallari” MChJ Buxoro vokzali boshlig‘i lavozimiga Urakov Sherzod Abdunaimovich tayinlandi. Shuningdek, Buxoro viloyati Ekologiya va iqlim o‘zgarishi bosh boshqarmasi boshlig‘i etib Abdullayev Jasurbek Ubaydullayevich tayinlandi.

Sherzod Urakov 1988-yil 12-aprelda Buxoro shahrida tug‘ilgan. 2010-yilda Buxoro oziq-ovqat va yengil sanoat texnologiya institutini, 2023-yilda esa Toshkent davlat transport universitetini tamomlagan. Ma’lumoti bo‘yicha menejment, tashishni tashkil etish va transport logistikasi yo‘nalishlari mutaxassisi hisoblanadi. Tayinlovga qadar u “O‘ztemiryo‘lyo‘lovchi” AJ tasarrufidagi “Yo‘l hujjatlarini rasmiylashtirish agentligi”ning Buxoro hududiy bo‘linmasi boshlig‘i vazifasida ishlab kelayotgan edi. Yangi lavozimda u Buxoro vokzali faoliyatini samarali tashkil etish, yo‘lovchilarga xizmat ko‘rsatish sifatini yanada oshirish va transport jarayonlarini takomillashtirishga mas’ul bo‘ladi.

Shuningdek, avval ushbu lavozimda faoliyat yuritgan Bazarov Fayzullojon Muxiddinovich “Temiryo‘l vokzallari” MChJ Navoiy temiryo‘l vokzali boshlig‘i lavozimiga tayinlangan.

Ekologiya tizimida ham muhim o‘zgarish amalga oshirildi. Ekologiya va iqlim o‘zgarishi milliy qo‘mitasi raisining tegishli buyrug‘iga ko‘ra, Abdullayev Jasurbek Ubaydullayevich Buxoro viloyati Ekologiya va iqlim o‘zgarishi bosh boshqarmasi boshlig‘i etib tayinlandi.

U 1981-yil 7-oktabrda Buxoro viloyati Olot tumanida tug‘ilgan. 2002-yilda Toshkent irrigatsiya va qishloq xo‘jaligini mexanizatsiyalashtirish muhandislari instituti milliy tadqiqot universitetining bakalavr bosqichini, 2004-yilda esa magistratura bosqichini tamomlagan.

Mehnat faoliyati davomida u Qishloq va suv xo‘jaligi vazirligi tizimida, “Xavfsiz daryo” davlat unitar korxonasida hamda boshqa qator tashkilotlarda turli mas’ul lavozimlarda ishlagan. So‘nggi yillarda Ekologiya va iqlim o‘zgarishi milliy qo‘mitasida faoliyat yuritib kelgan.

Mazkur tayinlovlar hududda transport infratuzilmasini rivojlantirish va ekologik boshqaruv samaradorligini oshirish yo‘lida navbatdagi muhim qadam sifatida baholanmoqda.