2025-yilda jami 11 nafar xorijlik Buxoroga doimiy yashash uchun ko‘chib kelgan

O‘zbekistonga doimiy yashash maqsadida ko‘chib kelayotganlar soni ortib bormoqda. Milliy statistika qo‘mitasi ma’lumotlariga ko‘ra, 2025-yilda xorijdan jami 1 159 nafar shaxs mamlakatga ko‘chib kelgan.

Statistikaga ko‘ra, ko‘chib kelganlarning asosiy qismini Rossiya va Qozog‘iston fuqarolari tashkil etadi. Xususan, Rossiyadan kelganlar umumiy ko‘rsatkichning 39,9 foizi, Qozog‘istondan kelganlar esa 20,3 foizini egallagan.

Shuningdek, Tojikistondan 10,3 foiz, Qirg‘izistondan 4,3 foiz hamda Turkmanistondan 3,1 foiz ko‘chib kelganlar qayd etilgan. Qolgan 22,1 foiz boshqa davlatlar hissasiga to‘g‘ri keladi.

Hududlar kesimida esa ko‘chib kelganlarning eng katta qismi Toshkent shahrida istiqomat qilishni tanlagan — 698 nafar. Shuningdek, Toshkent viloyatiga 275 nafar, Qoraqalpog‘iston Respublikasiga 101 nafar kishi joylashgan.

Boshqa hududlarda ko‘rsatkichlar nisbatan past bo‘lib, Buxoro viloyatiga 11 nafar, Sirdaryo viloyatiga 24 nafar, Farg‘ona viloyatiga 14 nafar kishi ko‘chib kelgan.

Shuningdek, Jizzax viloyati va Navoiy viloyatiga 12 nafardan, Xorazm viloyatiga 7 nafar, Qashqadaryo viloyati va Samarqand viloyatiga 2 nafardan, Namangan viloyatiga esa 1 nafar ko‘chib kelgan.

Mazkur raqamlar O‘zbekistonga ko‘chib kelish jarayonida ayniqsa qo‘shni va yaqin davlatlar fuqarolari ustunlik qilayotganini ko‘rsatadi. Shuningdek, poytaxt va unga yaqin hududlar migratsiya uchun eng jozibador manzil bo‘lib qolmoqda.