Nima uchun shifoxonalar devori asosan oq rangda bo‘ladi?

Deyarli har bir tibbiyot muassasasiga qadam qo‘yganimizda bizni oppoq devorlar kutib oladi. Hech o‘ylab ko‘rganmisiz, nega poliklinika va shifoxonalar uchun aynan shu rang tanlangan? Ma’lum bo‘lishicha, bu amaliyot inson ongi va kayfiyatiga ta’sir ko‘rsatuvchi bir qancha ilmiy asoslangan omillar majmuasidir. Daryo shular haqida yozmoqda.

Oq rangning psixologik ta’siri

“Nima uchun?” degan savolga javob izlashdan avval, oq rangning xususiyatlariga to‘xtalib o‘tish joiz. Inson ongi oq rangni an’anaviy ravishda yorug‘lik, poklik va kenglik bilan bog‘laydi. Albatta, ranglarni idrok etishda madaniy muhit va shaxsiy qarashlar ham muhim, biroq tibbiyotda oq rangning o‘rni alohida.

Oq rang ong osti darajasida sterillik va tartib hissini uyg‘otadi. Gigiyena me’yorlariga qat’iy rioya qilinishi shart bo‘lgan shifoxonalarda bu rang bemorlarga xavfsizlik hissini beradi. Bundan tashqari, oq rang miyani ortiqcha qo‘zg‘atuvchi omillardan cheklashga va tinchlanishga yordam beruvchi neytral fon vazifasini o‘taydi.

Vizual kenglik va yorug‘lik manbayi

Oq rangning eng muhim texnik xususiyatlaridan biri uning yorug‘likni juda yaxshi aks ettirishidir. Bu xususiyat:

• hatto kichik va derazasiz xonalarni ham vizual ravishda kengaytirishga;

• xonani yanada yorqinroq va shinamroq ko‘rsatishga;

• bemorlarda yopiq va qorong‘i joyda qolishdan tug‘iladigan xavotirni kamaytirishga xizmat qiladi.

Tibbiyot muassasalarining oq rangda bo‘lishi sanitariya-gigiyena talablari va psixologik tadqiqotlar natijalari mahsuli hamdir. Yorug‘ devorlar vizual stressni kamaytiradi, bu esa bemorning o‘zini xotirjamroq his qilishiga va shifokorga bo‘lgan ishonchini mustahkamlashga yordam beradi.

So‘nggi yillarda, ayniqsa yirik shaharlardagi shifoxona va poliklinikalarda faqat oq rang bilan cheklanib qolinmayapti. Interyerni yanada qulay qilish va kerakli xonani oson topish uchun devorlarda boshqa ranglar qo‘llanilmoqda.

Masalan, kattalar bo‘limlarida ko‘k rang tinchlantiruvchi muhit yaratishga yordam bersa, bolalar poliklinikalarida ko‘pincha tabiatni eslatuvchi yashil ranglardan foydalaniladi. Bunday ranglar bemorlarga qayerda ekanini tezroq tushunishga, kerakli xonalarni topishga va o‘zini yanada xotirjam his qilishga yordam beradi.