«Olot» chegara postida kontaktsiz yuk tashuvlari yo‘lga qo‘yilmoqda

«Xo‘jayli» va «Shovot» chegara o‘tkazish punktlarida bugungi kunda xalqaro yuk tashuvlari uchun faoliyat yuritayotgan «Olot» chegara o‘tkazish punktiga qo‘shimcha ravishda kontaktsiz yuk tashuvlari yo‘lga qo‘yiladi.

Buning natijasida O‘zbekiston va Turkmaniston o‘rtasida yana 2 ta chegara o‘tkazish punkti faoliyati qayta tiklanadi.

Joriy yilning 18-noyabr kuni transport va logistika masalalari bo‘yicha o‘zbek-turkman ishchi guruhining videokonferensiya aloqa shaklida bo‘lib o‘tgan uchrashuvi davomida kelishilgan vazifalar ijrosini ta’minlash maqsadida bugun “Xo‘jayli–Kunya–Urgench” hamda “Shovot–Dashoguz” chegara o‘tkazish punktlari ish faoliyati xalqaro yuk tashishlar uchun neytral zonada tirkama va yarim tirkamalarni kontaktsiz almashish yo‘li orqali tashkil etish bo‘yicha sinov o‘tkazildi.

2020-yilda koronavirus pandemiyasi natijasida mazkur chegara o‘tkazish punktlari joriy etilgan cheklov choralari natijasida yopilgan edi.Hozirda Transport vazirligi, Davlat bojxona qo‘mitasi hamda DXX chegara qo‘shinlari “Xo‘jayli – Kunya-Urgench”, “Shovot – Dashoguz” o‘tkazish punktlari ish faoliyatini sanitariya-epidemiologiya tadbirlariga qat’iy rioya etgan holda neytral zonada tirkama va yarim tirkamalarni kontaktsiz almashish yo‘li bilan qayta tiklash yuzasidan Turkmanistonnnig tegishli vazirlik va idoralari bilan hamkorlikdagi say’i-harakatlarni davom ettirmoqda.