Prezident maktabida seminar-trening o‘tkazildi

Joriy yilning 6-oktabr kuni O‘zbekiston Respublikasi Yoshlar ishlari agentligi huzuridagi Yosh maslahatchilar kengashining Buxoro viloyati vakillari Buxoro shahridagi Prezident maktabida seminar-trening tashkil qilishdi.

Unda yoshlar hayotida liderlik mahoratini oshirish, ularda sog‘lom fikr va sog‘lom ongni shakllantirish, dunyoqarashini kengaytirish, vatanparvarlik hissini rivojlantirish, huquqiy va madaniy ongini yuksaltirish, fuqarolik jamiyati va demokratik davlat barpo etishda yoshlarning munosib ishtirokini ta’minlash, sardorlik, volontyorlik, loyiha va grantlar haqida so‘z bordi.

Suhbat davomida oʻquvchi va oʻqituvchilarga Yosh maslahatchilar kengashi haqida taqdimot shaklida maʼlumot berildi.

“– Kengashning asosiy maqsadi – mamlakatda olib borilayotgan yoshlarga oid davlat siyosati samaradorligini baholashda jamoatchilik nazoratini yo‘lga qo‘yish, o‘sib kelayotgan yosh avlodni dahldorlik ruhida tarbiyalash, o‘z tengdoshlari muammolari yechimini izlashda davlat idoralari bilan yaqindan hamkorlik qilish, iqtidorli yoshlarni qo’llab-quvvatlash, yoshlar o‘rtasida kitobxonlik va zamonaviy ilm-fanni targ‘ib qilish, yoshlar tashkilotlari faoliyatiga amaliy ko‘mak berishdan iborat”, – deydi viloyat vakili Rustam Rahimboyev.

Shuningdek, kengashning vazifalari, tarkibi, shu vaqtgacha oʻtkazilgan tadbirlar va keyinchalik qilinishi rejalashtirilgan loyihalar haqida ham aytib o‘tildi. So‘ngra maktab oʻquvchilarining takliflari, kelajakdagi maqsadlari borasida qiziqarli suhbat olib borildi.