Buxoro IIB ning mard va go‘zal xodimalari jangovor tayyorgarligi musobaqada sinovdan o‘tkazildi – fotojamlanma

Buxoro viloyati Ichki ishlar organlarida xizmat olib borayotgan ayol xodimalar o‘rtasida sportning “Ko‘pkurash” turi bo‘yicha musobaqa o‘tkazildi.

Bugun ayollar jamiyatimizning barcha sohasida bo‘lgani kabi huquqni muhofaza qilish organlarida ham mard o‘g‘lonlarimiz bilan bir safda turib, yurtimiz tinchligi va xalqimiz osoyishtaligini himoya qilishda munosib ishtirok etishmoqda. Demakki, ularning jangovar tayyorgarligi ham muntazam nazoratdan o‘tkazib boriladi.

Shu maqsadda joriy yilning 10-oktabr kuni viloyat ichki ishlar organlarida xizmat vazifasini olib borayotgan ayol xodimalar o‘rtasida Kogon tumani “O‘rtacho‘l” MFY hududida joylashgan harbiy dala-maydonida sportning “Ko‘pkurash” turi bo‘yicha musobaqa o‘tkazildi, – deya xabar bermoqda viloyat IIB matbuot xizmati.

Mazkur sport musobaqalarini o‘tkazishdan ko‘zlangan maqsad xodimalar orasida sog‘lom turmush tarzini ommalashtirish, sportni yanada rivojlantirish va shaxsiy tarkibning jismoniy tayyorgarligini oshirishdan iborat.

Qizg‘in va murosasiz bahslarga boy o‘tgan musobaqada ishtirokchilar 4 jamoaga bo‘lingan holda, jami 6 ta shart asosida o‘zaro bellashdilar. Yakuniy natijalarga ko‘ra, oliy, 1-o‘rinni “Humo” jamoasi egallab, ishtirokchilar munosib rag‘batlantirildi.