Yo‘lni berkitganga gunoh yoziladimi?

Savol: Qo‘shnim hamma foydalanadigan yo‘lni to‘sib, o‘zining uyi hududiga qo‘shib oldi. Atrofida 5-6 oila yashaymiz, o‘tishimizga yo‘l yo‘q. Boshqa bir qo‘shni o‘z uyining devorini yiqitib, yo‘l ochishga majbur bo‘ldi. Aytingchi, dinimizda yo‘lni berkitganga gunoh yoziladi-mi?

Javob: Ibn Umardan rivoyat qilinadi: Nabiy sollallohu alayhi vasallam aytdilar: “Kim nohaq biron yerni olib olsa, qiyomat kuni yetti qavat yer ostida qoldiriladi” (Imom Buxoriy rivoyati).

Dinimizda qo‘ni-qo‘shnilarga ozor bermaslik, ularni behurmat qilmaslik naqadar zarur ish ekani ta’kidlanadi. Qo‘ni-qo‘shnilarga yomon munosabatda bo‘lish, ularga ozor berish o‘qilgan nafl namozlar, tutilgan nafl ro‘zalarni ham yuvib ketib, ularni foydasiz holga keltirib qo‘yadi. Aksincha, qo‘shnilari bilan tinch-totuv yashagan, ularga ozor bermagan odam katta baxt-saodatga erishadi va ahli jannatdan bo‘ladi.

Qo‘shnilarning yo‘lini to‘sish ham ularga ozor berish hisoblanadi. Bunday ishlardan tiyilish, tavba qilish, qo‘shnilardan uzr so‘rash lozimdir.

Muallif: Muhammad Ayyub Homidov.
Manba: O‘zbekiston musulmonlari idorasi Buxoro viloyati vakilligi.