Avto ehtiyot qismlari “ko‘rinishi”dagi sigaretalar bojxonadan o‘tkazilmadi

Kuni kecha xorijdan temir yo‘l orqali mamlakatimiz hududiga kirib kelgan poyezd konteynerlari tranzit yo‘nalishda harakatlanib, qo‘shni davlatga yetib borishi kerak edi. Lekin, manzilgacha yetib bormadi.

Buning asosisy sababi esa yukning kuzatuv hujjatlarida “Avval muomalada bo‘lgan avtomobil ehtiyot qismlari” deya ko‘rsatilgan mazkur tovarlar va bojxona postida o‘rnatilgan inspeksion ko‘rik majmuasining rentgen tasvirlari o‘zaro mos kelmaganligi bo‘lib, Buxoro viloyati bojxona boshqarmasining “Xo‘jadavlat” temir yo‘l chegara bojxona posti xodimlarida shubha uyg‘otadi.

Shuning uchun amaldagi qonunchilikka ko‘ra, yuk egalari ishtirokida bojxona ko‘rigi o‘tkazilishi kerak bo‘ladi va bu haqida yuk egalari xabardor qilinadi. Lekin 5 ish kuni davomida yuk egalari tomonidan hech qanday murojaat bo‘lmaganligi sababli, mazkur tovarlar xolislar ishtirokida bojxona ko‘rigidan o‘tkaziladi.

Ko‘rik davomida yuk kuzatuv hujjatlarida ko‘rsatilmagan qariyb 11 mlrd so‘mga teng jami 700 719 ta qutida “Palomo” brendi ostidagi xorijiy tamaki mahsulotlari borligi aniqlandi. Mazkur tovarlar hozirda vaqtincha saqlovga olingan bo‘lib, holat yuzasidan surishtiruv ishlari olib borilmoqda.