Buxoro neftni qayta ishlash zavodi AI-80 benzini ishlab chiqarish hajmini 15% ga oshirdi

“O‘zbekneftgaz” AJ Boshqaruv raisi Mehriddin Abdullayev topshirig‘iga asosan, Buxoro neftni qayta ishlash zavodida 2021-yilga nisbatan AI-80 rusumli avtobenzinning kunlik ishlab chiqarish hajmini 2 200 tonnadan 2 800 tonnaga, suyultirilgan gazni esa 14 532 tonnadan 15 700 tonnaga oshirilmoqda.

Mamlakatimiz iste’molchilarini AI-80 rusumli avtobenzin va suyultirilgan gaz bilan uzluksiz ta’minlash maqsadida Buxoro zavodida korxona va ishlab chiqarish sexlari rahbarlaridan “Tezkor shtab” tuzildi.

Korxonada tovar benzinlari va suyultirilgan uglevodorod gazi ishlab chiqarilishini oshirishga qaratilgan ishlar tezkorlik bilan amalga oshirilmoqda. Benzin ishlab chiqarish qurilmasi loyiha quvvatini 100% dan 115% ga oshirdi.

Buxoro neftni qayta ishlash zavodida dekabr oyida qayta ishlash hajmlarini oshirishda import xom ashyolari ulushi ham 30% gacha oshirildi.

O‘z navbatida, Respublikamiz ichki bozorida neft-gaz mahsulotlariga ortib borayotgan talabni qondirish maqsadida ishlab chiqarilgan suyultirilgan gazni iste’molchilarga yetkazib berish nafaqat temir yo‘l vagonlari, balki yuk tashuvchi avtosisternalarda ham amalga oshirilmoqda.