Shavkat Mirziyoyev kutilmaganda Toshkentdagi “Shirin” mahallasiga bordi

Davlatimiz rahbari «Toshkent issiqlik markazi» korxonasining Chilonzor issiqlik markazini borib ko‘rdi.

Ushbu majmua 1969-yilda qurilgan. Qozonxona 700 Gkal quvvatga ega. Markaz 921 ta ko‘p qavatli uy va 100 dan ortiq ijtimoiy soha ob’yektlariga issiqlik quvvati yetkazib beradi.

So‘nggi kunlarda ob-havoning keskin sovib ketishi oqibatida gaz bosimining pastligi kuzatilmoqda. Bu isitish darajasiga salbiy ta’sir qilmoqda.

Chilonzor issiqlik markazida ham uskuna va tarmoqlar eskirgan. Issiqlikni uzatishda yo‘qotishlar bor. Shu bois bu boradagi zaruriy chora-tadbirlar muhokama qilindi. Davlatimiz rahbari issiqlik ishlab chiqarishning muqobil manbalarini izlash, quvurlar va uylarda haroratni asrash zarurligini ta’kidladi.

Toshkent shahri tumanlariga elektrda ishlaydigan 2 megavattli stansiyalar olib kelib, qo‘shimcha issiqlik quvvatlari yaratish taklifi ma’qullandi. Bunday bitta qurilma 1 340 ta xonadonga issiqlik yetkazib beradi. Ishlab chiqarish xarajati kamligi evaziga narx oshmaydi.

Shuningdek, Shavkat Mirziyoyev kutilmaganda shu yerdagi “Shirin” mahallasini kirib ko‘rdi. Aholi xonadonlarida bo‘lib, turmush sharoitlari, issiqlik ta’minoti bilan qiziqdi.

Yurtboshimiz bu yerdagi kommunal xizmatlar sifati, shu jumladan xonadonlarda issiqlik ta’minoti bilan shaxsan tanishib, u yerdagi ahvolni ko‘zdan kechirdi. Mahalladagi vaziyat Prezidentimizning jiddiy e’tirozlariga sabab bo‘ldi.

Mahalladagi vaziyat Prezidentimizning jiddiy e’tirozlariga sabab bo‘ldi