Buxoro viloyati Sog‘liqni saqlash boshqarmasi boshlig‘ining birinchi o‘rinbosari Ixtiyor Abdulxakov Singapurda nima qilyapti?

Ayni kunlarda o‘zbekistonlik bir guruh sog‘liqni saqlash tizimi mas’ullari Singapurga malaka oshirish uchun yuborildi.

Qayd etish o‘rinliki, ushbu loyiha Sog‘liqni saqlash vazirligi va NANYANG Singapur xalqaro instituti o‘rtasida imzolangan o‘zaro anglashuv memorandumiga asosan amalga oshirildi.

Singapurda tashkil etilgan “Yetakchilar uchun jamoat salomatligini boshqarish” o‘quv kurslarida mamlakatimiz sog‘liqni saqlash tizimining hududiy boshqaruv apparati mutaxassislari, ixtisoslashgan markazlar filiallari rahbarlari, viloyat ko‘p tarmoqli tibbiyot markazlari bosh vrach va o‘rinbosarlari va tumanlar tibbiyot birlashmalari boshliqlaridan iborat 25 nafar mutaxassis ishtirok etmoqda.

Ularning zimmasiga Singapur Respublikasining sog‘liqni saqlashni boshqarishdagi ilg‘or tajribalarini o‘rganib, mamlakatimizda tibbiyot sohasiga tatbiq etish bo‘yicha taklif va tavsiyalar ishlab chiqish vazifasi yuklatilgan. Buxoro viloyat SSB Axborot xizmati xabariga ko‘ra, Buxorodan yagona ishtirokchi bo‘lgan viloyat hokimligi huzuridagi Sog‘liqni saqlash boshqarmasi boshlig‘ining birinchi o‘rinbosari Abdulxakov Ixtiyor Umarovich ham ushbu maxsus kurslarda faol qatnashmoqda.