1 yoshga yetmagan bola sud qarori bilan onasiga qaytarildi

Majburiy ijro byurosining Buxoro viloyat boshqarmasi tomonidan taqdim etilgan ma’lumotlarga ko‘ra, oilaviy kelishmovchiliklar sabab turmush o‘rtog‘ining uyini tark etishga majbur bo‘lgan yosh ayol hali 1 yoshga ham to‘lmagan farzandini o‘zi bilan olib keta olmagan. Erkak esa bolani hech kimga bermasligini, uni o‘zi tarbiyalashini bildirgan.

Bolasiz qolgan ayol ota-onasi bilan birga bir necha bor qudalar xonadoniga borib, farzandini olib ketishga uringan. Biroq bu harakatlar samara bermagan. Shundan so‘ng ular yordam so‘rab Majburiy ijro byurosining Jondor tumani bo‘limiga murojaat qilgan.

Byuro tomonidan bolani olib berish tartibi bo‘yicha huquqiy tushuntirishlar berilgach, ayol farzandini o‘z tarbiyasiga topshirish haqida sudga da’vo arizasi kiritgan. Sud ish holatlarini atroflicha o‘rganib, da’voni qanoatlantirgan.

Sud qarori ijro etish uchun Jondor tuman bo‘limiga kelib tushgach, ijro ishini yuritish to‘g‘risida qaror qabul qilinib, darhol ijro harakatlari boshlangan. Davlat ijrochisi tomonidan tegishli tashkilotlar vakillari ishtirokida o‘tkazilgan majburiy ijro tadbirlari davomida voyaga yetmagan bola sog‘-salomat holda onasining tarbiyasiga topshirilgan.

Hozirda mazkur ish doirasidagi tegishli tadbirlar belgilangan tartibda davom ettirilmoqda.