Buxoro viloyati IIB Migratsiya va fuqarolikni rasmiylashtirish boshqarmasi (“OVIR” xizmati) yangi binoga ko‘chdi. Endilikda fuqarolar pasport-viza, fuqarolik va migratsiya bilan bog‘liq xizmatlardan yangi manzilda foydalanishlari mumkin bo‘ladi.

Ma’lum qilinishicha, boshqarma Bahouddin Naqshband ko‘chasidagi 10-uyga joylashtirilgan. Yangi bino eski S. Ayniy teatri va sobiq tug‘ruqxona hududida, Turizm politsiyasi boshqarmasi yonida joylashgan.

Fuqarolar uchun xizmat ko‘rsatish tartibi ham e’lon qilindi. Boshqarma dushanbadan jumagacha soat 09:00 dan 18:00 gacha faoliyat yuritadi. Shanba kuni esa xizmatlar 09:00 dan 13:00 gacha ko‘rsatiladi. Yakshanba dam olish kuni etib belgilangan.

Tushlik vaqti har kuni 13:00 dan 14:00 gacha davom etadi. Mutasaddilar fuqarolardan murojaat qilishda ushbu vaqtlarni inobatga olishni so‘ramoqda.

Shuningdek, boshqarma rahbariyati bilan bog‘lanish uchun aloqa raqamlari ham taqdim etildi. Fuqarolar zarur ma’lumotlarni olish yoki murojaat qilish uchun (+998) 65-224-21-10, +99865-224-42-32 hamda (+998) 65-224-33-01 telefon raqamlariga qo‘ng‘iroq qilishlari mumkin.

Mas’ullar ushbu o‘zgarish haqida yaqinlar va tanishlarni ham xabardor qilishni tavsiya etdi. Bu esa fuqarolarga migratsiya va fuqarolik xizmatlaridan foydalanishda ortiqcha ovora bo‘lishning oldini olishga xizmat qiladi.