Davlatimiz rahbarining “Madaniyat, san’at va adabiyot sohalari xodimlaridan bir guruhini mukofotlash to‘g‘risida”gi Farmoniga muvofiq davlat mukofotlariga sazovor bo‘lgan bir guruh yurtdoshlarimiz qatorida Buxoro viloyatining 5 nafar vakili ham bor.

Shu munosabat bilan kuni kecha Buxoro viloyati hokimligida mukofotlarni topshirish marosimi bo‘lib o‘tdi. Unda viloyatdagi huquqni muhofaza qiluvchi idoralar, davlat va jamoat tashkilotlari rahbarlari, madaniyat va san’at sohasi vakillari, jamoatchilik hamda yoshlar ishtirok etdi.

Tadbirda viloyat hokimi Botir Zaripov davlat mukofotlariga sazovor bo‘lgan yurtdoshlarni tabriklab, ularning madaniyat, san’at va adabiyot rivojiga qo‘shayotgan hissasini alohida e’tirof etdi.

Ta’kidlanganidek, keyingi yillarda mamlakatimizda madaniyat va san’at sohasini qo‘llab-quvvatlash, ijodkorlar uchun munosib sharoitlar yaratish hamda milliy madaniy merosni asrab-avaylash borasida keng ko‘lamli ishlar amalga oshirilmoqda.

Bugungi kunda Buxoro viloyatida ham madaniyat va san’at sohasi jadal rivojlanib bormoqda. Xalqaro va respublika miqyosida o‘tkazilayotgan “Xalqaro zamonaviy san’at biyennalesi”, “Xalqaro zardo‘zlik va zargarlik festivali”, “Ipak va ziravorlar” festivali, Hunarmandlar kuni tadbirlari hamda boshqa yirik madaniy loyihalar viloyatning turistik va madaniy salohiyatini yanada oshirmoqda.

Shuningdek, so‘nggi yillarda madaniyat muassasalarining moddiy-texnik bazasini mustahkamlash, yangi obyektlarni barpo etish va mavjudlarini ta’mirlash bo‘yicha ham qator ishlar amalga oshirildi. Xususan, 2017–2025-yillar davomida viloyatdagi 13 ta madaniyat markazi ta’mirlanib, Olot, G‘ijduvon va Jondor tumanlarida madaniyat bo‘limlarining yangi binolari foydalanishga topshirildi.

Ma’lumotlarga ko‘ra, birgina 2025-yilda madaniyat va san’at sohasini rivojlantirish uchun respublika va mahalliy budjet mablag‘lari hisobidan 37 milliard so‘m yo‘naltirilgan.

Tadbir yakunida davlat mukofotlari o‘z egalariga tantanali ravishda topshirildi. Mukofot sohiblari ularga ko‘rsatilayotgan yuksak e’tibor va e’tirof uchun minnatdorlik bildirib, kelgusida ham yurt ravnaqi va milliy madaniyat taraqqiyoti yo‘lida fidokorona mehnat qilishlarini ta’kidladi.