Buxoro viloyatida maktabgacha va maktab ta’limi tizimini yangi bosqichga olib chiqish, ta’lim sifati va samaradorligini oshirish, zamonaviy infratuzilma yaratish hamda o‘quvchi va pedagoglar uchun keng imkoniyatlar shakllantirish bo‘yicha tizimli ishlar amalga oshirilmoqda. Bu haqda Buxoro viloyati maktabgacha va maktab ta’limi boshqarmasi Buxoroisharif.uz internet nashriga ma’lum qildi.

Viloyatda jami 2 702 ta ta’lim muassasasi faoliyat yuritmoqda: 586 ta umumta’lim maktabi, 2 096 ta maktabgacha ta’lim tashkiloti, 14 ta «Kelajak» markazi va bitta Pedagogik mahorat markazi.

Ayni paytda 236 ta ta’lim tashkilotida qurilish-ta’mirlash ishlari olib borilmoqda. 151 ta maktab va 85 ta maktabgacha ta’lim tashkiloti yangilanadi. Oltita yangi muassasa quriladi, 120 ta obyekt rekonstruksiya qilinadi, 110 ta muassasa mukammal ta’mirlanadi. Loyihalarga 1 trillion 402 milliard so‘m yo‘naltirilgan bo‘lib, 24 872 ta qo‘shimcha o‘quvchi va 7 480 ta tarbiyalanuvchi o‘rni yaratiladi.

2 090 ta maktabgacha ta’lim tashkilotida 148 377 nafar 3–7 yoshli bola ta’lim-tarbiyaga jalb etilgan, qamrov 90,4 foizni tashkil etadi. Olti yoshli bolalar qamrovi 100 foizga yetkazildi. 211 ta maktabda 386 ta tayyorlov guruhi tashkil etilib, 8 346 nafar bola maktabga tayyorlanmoqda.

2025–2026-o‘quv yilida 22 257 nafar o‘quvchi 11-sinfni tamomladi. Ularning 426 nafari oltin, 127 nafari kumush medal oldi. 13 ta maktabda kasb-hunarga o‘qitish yo‘lga qo‘yilib, 352 nafar bitiruvchi kasb sertifikatiga ega bo‘ldi.

Buxorolik o‘quvchilar xalqaro va respublika fan olimpiadalarida 31 ta medal oldi. Xalqaro olimpiadalarda ikki oltin, 16 kumush va to‘qqiz bronza, respublika olimpiadasida esa uchta birinchi hamda bitta uchinchi o‘rin qayd etildi.

Attestatsiyada 13 547 nafar pedagog ishtirok etib, o‘rtacha natija 63,8 ball bo‘ldi va Buxoro viloyati respublikada birinchi o‘rinni egalladi. Malaka toifasiga ega pedagoglar ulushi 70,2 foizga yetib, bir yilda besh foiz oshdi.

1 000 AQSH dollari va undan ortiq maosh olayotgan o‘qituvchilar soni 2024–2025-o‘quv yilidagi 986 nafardan 2025–2026-o‘quv yilida 2 186 nafarga yetdi.

Ishga qabul qilishning elektron tizimida bir oyda 1 510 ta bo‘sh ish o‘rni e’lon qilindi. 4 552 nafar nomzod ariza topshirdi, 3 096 nafari testda qatnashdi va 550 nafari ishga qabul qilindi.

Janubiy Koreyaning ENOZ tashkiloti bilan hamkorlikda 42-ixtisoslashtirilgan maktabda innovatsion o‘quv modeli joriy etilmoqda. Loyihaga bir milliard so‘m yo‘naltirilib, dasturlash, robototexnika, generativ sun’iy intellekt, VR, AR va IT yo‘nalishlarida imkoniyatlar yaratilmoqda. Tajriba barcha tuman va shaharlarda ommalashtirilmoqda.

Barcha maktablarda 10–11-sinflar uchun matematika, ona tili va tarixdan qo‘shimcha to‘garaklar tashkil etildi. 2 500 nafardan ortiq 11-sinf o‘quvchisi beshta fandan 189 ballik sertifikat oldi. Majburiy fanlar bo‘yicha 8 298 ta ona tili, 5 982 ta matematika, 3 276 ta O‘zbekiston tarixi va 2 901 ta asosiy fan sertifikati qo‘lga kiritildi.

«Kelajak uchun xorijiy til» loyihasi doirasida barcha maktablarda tabaqalashtirilgan mashg‘ulotlar yo‘lga qo‘yildi. 22 257 nafar bitiruvchining 8 130 nafari, ya’ni 36,5 foizi xorijiy til sertifikatiga ega bo‘ldi. Ularning 4 200 nafardan ortig‘i sertifikatni 2026-yilning birinchi yarmida oldi.

Maktablarda qo‘shimcha ta’lim xizmatlari orqali to‘qqiz oyda 56,7 milliard so‘mlik tushum ta’minlandi. Birinchi sinfga qabul 2026–2027-o‘quv yilidan barcha maktablarda onlayn tizimga o‘tkazildi.

Yangi baholash tizimi 2024–2025-o‘quv yilidagi 154 ta maktabdan 2026–2027-o‘quv yilida 536 ta maktabgacha kengaytirildi.

Xorijda malaka oshirib qaytgan pedagoglar soni 22 nafardan 110 nafarga yetdi. 2026–2027-o‘quv yilida maktablardagi xorijlik pedagoglar sonini 143 nafarga yetkazish rejalashtirilgan.

«Yosh kitobxon» tanlovining respublika bosqichida Peshku tumanidagi 23-maktabning 6-sinf o‘quvchisi Farzona Nosirova mutlaq g‘olib bo‘lib, Prezident sovg‘asi — «BYD Chazor» elektromobilini qo‘lga kiritdi. «Turon» maktab teatr tanlovida Kogon shahar 3-maktabining «Elegant» jamoasi ikkinchi o‘rinni egalladi.

2025–2026-o‘quv yilida 152 ta maktabda 205 ta inklyuziv sinf tashkil etilib, 274 nafar alohida ta’lim ehtiyojli o‘quvchi qamrab olindi. Yangi o‘quv yilida bu ko‘rsatkichni 224 ta maktab, 330 ta inklyuziv sinf va 424 nafar o‘quvchigacha kengaytirish rejalashtirilgan.

Boshqarma ta’lim tizimidagi islohotlar davom ettirilishini, asosiy maqsad har bir bola uchun sifatli ta’lim, har bir pedagog uchun rivojlanish imkoniyati va raqobatbardosh avlodni tarbiyalash ekanini ta’kidladi.