Buxoro yangiliklari
Buxoroda 2- va 17-sonli avtobus yo‘nalishlari uzaytirildi
Buxoro shahrida 2- va 17-sonli avtobus yo‘nalishlari 2026-yil 1-oktyabrdan boshlab uzaytirildi. Bu haqda Buxoro viloyati transport boshqarmasi Buxoroisharif.uz internet nashriga ma’lum qildi.
2-sonli “Buxoro ASHB — Sitora bozori” shahar avtobus yo‘nalishi Tutkunda aholi punktiga qadar uzaytirildi. Ushbu yo‘nalishda 14 ta “Asia Star” rusumli avtobus xizmat ko‘rsatadi va ularning barchasida elektron to‘lov tizimi mavjud.
17-sonli “Aeroport — Chor-Bakr bosh bekati” shahar avtobus yo‘nalishi esa 20-sonli maktabga qadar uzaytirildi. Mazkur yo‘nalishda elektron to‘lov tizimi o‘rnatilgan 10 ta “Zhong Tong” rusumli avtobus qatnaydi.
Transport boshqarmasi yo‘lovchilarni jamoat transportida yo‘lkira haqini elektron tarzda to‘lashga chaqirdi.