Islom
Qiblaga qarab oyoq uzatish mumkinmi?
Ko‘pincha qibla tarafga qarab oyoq uzatib yotishga majbur bo‘lamiz. Yoshligimizdan bizga “qiblaga oyoq cho‘zma, yomon bo‘ladi”, – deb o‘rgatishgan. Ammo nega yomon bo‘ladi yoki bu holat shunchaki qiblaga nisbatan hurmatsizlikmi?
Javob: Bismillahir Rohmanir Rohim. Qibla — Allohning shiorlaridan, din nishoni va belgilaridan biridir. Alloh taolo Qur’oni karimda shunday marhamat qiladi:
ذَلِكَ وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ
ya’ni: “…Kim Allohning shiorlarini ulug‘lasa, albatta, bu qalblarning taqvosidandir” (“Haj” surasi, 32-oyat).
Shuning uchun qiblaga qarab oyoq uzatib o‘tirish, qibla tarafga qarata tuflash, Qiblaga oldini yoki orqasini qilib hojat chiqarish makruhdir. Alloma Abdulhay Laknaviy rahimahulloh shunday deydilar:
ويكره مد الرجلين إلى الكعبة في النوم وغيره عمدا من غير عذر
“Uyquda yoki uyg‘oqlikda uzrsiz Ka’baga ikki oyoqni uzatish makruh sanaladi” (“An-Nofiul kabir” kitobi). Vallohu a’lam.
O‘zbekiston musulmonlari idorasi Fatvo hay’ati.
Manba: O‘zbekiston musulmonlari idorasi Buxoro viloyati vakilligi.