Buxoroda shaxmat bo‘yicha viloyat chempionati yakunlandi

2026-yil 2–3-may kunlari Buxoro shahridagi “Universal” sport majmuasida erkaklar va ayollar o‘rtasida shaxmat bo‘yicha viloyat chempionati bo‘lib o‘tdi. Musobaqa shveytsarcha tizimda 9 tur davomida tashkil etildi. Unda viloyatning turli hududlaridan 109 nafar iqtidorli shaxmatchilar ishtirok etdi.

Chempionat yakunlariga ko‘ra erkaklar o‘rtasida Qorako‘l tumanidan To‘xtamurod Navro‘zov birinchi o‘rinni egalladi. Ikkinchi o‘rin Vobkent tumanidan Jahongir Dilmurodovga nasib etdi. Uchinchi o‘rinni esa Kogon tumanidan Sherbek Shavqiyev qo‘lga kiritdi.

Ayollar o‘rtasida esa Buxoro shahridan Mohjahon Raxmonova chempionlikni qo‘lga kiritdi. Ikkinchi o‘rin yana Buxoro shahridan Mariya Mulinaga nasib etdi. Qorako‘l tumanidan E’zoza Hazratova uchinchi o‘rinni egalladi.

G‘olib va sovrindorlar diplom va medallar bilan taqdirlandi. Musobaqa yuqori saviyada tashkil etilib, ishtirokchilar o‘rtasida murosasiz bahslar kechdi.

Mazkur chempionat viloyatda shaxmat sportini rivojlantirish va ommalashtirishda muhim bosqichlardan biri bo‘ldi. Musobaqa yoshlar va tajribali shaxmatchilar uchun o‘z mahoratini namoyish etish imkonini yaratdi. Ko‘plab ishtirokchilar yangi strategiyalar va taktikalarni amalda sinab ko‘rdi.

Shuningdek, bu kabi turnirlar iqtidorli sportchilarni aniqlash va ularni yuqori bosqichlarga tayyorlashda muhim ahamiyat kasb etadi. Murabbiylar uchun ham o‘z shogirdlarining tayyorgarlik darajasini baholash imkoniyati yaratildi. Chempionat davomida sportchilar o‘rtasida do‘stona muhit va sog‘lom raqobat hukm surdi.

Mutaxassislar ta’kidlashicha, shaxmat intellektual salohiyatni oshirish, mantiqiy fikrlashni rivojlantirish va strategik qaror qabul qilish ko‘nikmalarini shakllantirishda muhim rol o‘ynaydi. Shu sababli hududlarda bu sport turini keng targ‘ib qilishga alohida e’tibor qaratilmoqda.

Kelgusida ham viloyatda bunday musobaqalarni muntazam o‘tkazish rejalashtirilgan. Bu esa yangi iste’dodlarni kashf etish va ularni respublika hamda xalqaro musobaqalarga tayyorlashga xizmat qiladi.