Endi ovchilik guvohnomasi uchun kurs va testdan o‘tish talab etiladi

2026-yil 3-avgustdan boshlab O‘zbekistonda ovchilik guvohnomasini olishni istagan fuqarolar uchun yangi tartib joriy etiladi. Endilikda guvohnoma olish uchun faqat ariza topshirishning o‘zi yetarli bo‘lmaydi. Talabgorlar maxsus o‘quv kurslarini tamomlab, yakuniy test sinovidan muvaffaqiyatli o‘tishi hamda sertifikat olishi shart bo‘ladi.

Mazkur tartib Adliya vazirligi tomonidan davlat ro‘yxatidan o‘tkazilgan «Ovchilik guvohnomasini olish uchun talabgorlarni o‘quv kurslarida o‘qitish tartibi to‘g‘risidagi nizom» asosida joriy etilmoqda. Hujjat 2026-yil 3-iyul kuni 3887-son bilan davlat ro‘yxatidan o‘tkazilgan.

Nizomga ko‘ra, ovchilik guvohnomasini olishni istagan fuqarolar Ekologiya va iqlim o‘zgarishi milliy qo‘mitasi huzuridagi «Ekohudud va ovchilikni rivojlantirish departamenti» davlat muassasasida yoki ushbu muassasa bilan shartnoma tuzgan ta’lim tashkilotlarida 10 soatlik maxsus o‘quv kurslarini o‘tashi lozim.

Mashg‘ulotlar tinglovchilarga qulaylik yaratish maqsadida auditoriya shaklida ham, masofaviy ta’lim orqali ham tashkil etiladi. Fuqarolar yilning istalgan vaqtida elektron yoki yozma shaklda ariza topshirish imkoniyatiga ega bo‘ladi.

O‘quv kurslari 20–30 nafardan oshmaydigan akademik guruhlarda olib boriladi. Darslar ma’ruza va seminar shaklida o‘tkazilib, har bir mashg‘ulotning davomiyligi 80 daqiqani tashkil etadi.

Kurs yakunida maxsus komissiya tomonidan test sinovi o‘tkaziladi. Imtihon natijalari 100 ballik tizim asosida baholanadi. Kamida 70 ball, ya’ni 70 foiz natija qayd etgan tinglovchilarga ovchilik guvohnomasini olish uchun zarur bo‘lgan sertifikat beriladi.

Yangi nizom 2026-yil 3-avgustdan rasman kuchga kiradi.

Yangi tartibning joriy etilishi ovchilik faoliyatini yanada tartibli va mas’uliyatli tashkil etishga xizmat qilishi kutilmoqda. Maxsus o‘quv kurslari orqali fuqarolar ovchilik qoidalari, xavfsizlik talablari, quroldan foydalanish madaniyati hamda tabiatni muhofaza qilish bo‘yicha zarur bilimlarni egallaydi. Bu esa noqonuniy ov qilish holatlarining kamayishi va biologik xilma-xillikni asrashga ijobiy ta’sir ko‘rsatishi mumkin. Mutaxassislarning fikricha, ovchilik bilan shug‘ullanuvchi shaxslarning nazariy tayyorgarligi va huquqiy savodxonligini oshirish tabiat resurslaridan oqilona foydalanishning muhim omillaridan biridir. Shu tariqa, yangi tizim ovchilik madaniyatini yuksaltirish va ekologik muvozanatni saqlashga qaratilgan yana bir muhim qadam sifatida baholanmoqda.