Gʻijduvonda 90 oʻrinli yangi bogʻcha foydalanishga topshirildi

Gʻijduvon tumanidagi “Oqgul” mahallasida 18-son davlat maktabgacha taʼlim tashkilotining mukammal taʼmirlangan binosi va 90 oʻrinli yangi qoʻshimcha binosi foydalanishga topshirildi. Bu haqda Buxoro viloyati hokimligi Buxoroisharif.uz internet nashriga ma’lum qildi.

Loyiha Oʻzbekiston davlat mustaqilligining 35 yilligi arafasida amalga oshirildi. U Gʻijduvon tumanida bolalar uchun sifatli maktabgacha taʼlim xizmatlarini kengaytirish va munosib sharoit yaratishga qaratilgan.

Muassasa Islom taraqqiyot banki hamda OPEK Xalqaro taraqqiyot jamgʻarmasi ishtirokidagi “Qishloq joylarni barqaror rivojlantirish” loyihasi doirasida 4,2 milliard soʻm hisobidan mukammal taʼmirlandi. Qoʻshimcha bino bilan birga bolalar uchun zamonaviy, qulay va xavfsiz muhit yaratildi.

Ochilish tadbirida tuman hokimligi, Maktabgacha va maktab taʼlimi boʻlimi mutasaddilari, taʼlim tashkiloti xodimlari, ota-onalar, nuroniylar va jamoatchilik vakillari qatnashdi.

Tadbirda maktabgacha taʼlim tizimini rivojlantirish, bolalarning sifatli taʼlim va tarbiya olishi uchun sharoit yaratish davlat siyosatining ustuvor yoʻnalishlaridan biri ekani qayd etildi.

Yangi taʼlim maskani hududdagi bolalarning maktabgacha taʼlim bilan qamrovini kengaytirishga, ularning intellektual, jismoniy va maʼnaviy rivoji uchun qoʻshimcha imkoniyatlar yaratishga xizmat qiladi.

Tadbir ishtirokchilari muassasada yaratilgan sharoitlar bilan tanishdilar.