“Ozodlik” radiosi – yolg‘on va bo‘xton minbari (–mi?)

Joriy yilning 29-mart kuni “Ozodlik” radiosining “Sizdan Telegram” nomli Telegram-kanalida “Аvariya holatidagi bog‘cha. O‘g‘limni u yerga jo‘natgim kelmay qoldi” nomli xabar chiqdi.

Mazkur maqola yuzasidan Buxoro viloyati Xalq taʼlimi boshqarmasi tomonidan olib borilgan o‘rganish natijasida u haqiqatga to‘g‘ri kelmasligi maʼlum bo‘ldi.

Dastavval maqola to‘g‘risida: unda Kogon tumanida joylashgan 45-maktabgacha taʼlim tashkiloti xaroba ekanligi, ota-onalar bolalarini mazkur maktabgacha taʼlim tashkilotiga jo‘natgisi kelmayotganligi to‘g‘risida maʼlumotlar keltirilgan.

Xo‘sh, ushbu maʼlumotlar qanchalik to‘g‘ri?

Birinchidan, Kogon tumanida 15 ta davlat, 72 ta oilaviy, 7 ta davlat-xususiy sherikchilik va 2 ta xususiy shakldagi maktabgacha taʼlim tashkilotlari mavjud bo‘lib, Kogon tumanida 45-son maktabgacha taʼlim tashkiloti esa umuman mavjud emas.

Ikkinchidan, yuqoridagi 45–sonli maktabgacha taʼlim tashkilotining binosi ekanligi taʼkidlangan fotosuratlar mazkur tumanga umuman taalluqli emasligi maʼlum bo‘ldi. Ushbu fotolardagi holat Buxorodagi birorta MTM ga tegishli emasligi oydinlashdi.

Buxoro viloyati xalq taʼlimi boshqarmasining qoʻshimcha qilishicha, “Ozodlik” radiosi aynan mana shu kabi holatlardan foydalanib, o‘zining yolgʻon maʼlumotlari bilan aholining ongini zaharlashga urinmoqda.

Xulosa o‘rnida esa shuni ta’kidlash o‘rinliki, bugungi axborot asrida turli ijtimoiy tarmoqlar (internet) orqali ma’lum bir voqelikni bir zumda bilib olish mumkin. Biroq, uning qanchalik to‘g‘ri yoki haqiqatga yaqin ekanligini aniqlash biroz mushkul nazarimizda.