Buxoroda qaysi mamlakatlardan ko‘p sayyoh tashrif buyurmoqda?

Ayni kunda viloyatimizda havo harorati ancha salqin bo‘lishiga qaramasdan sharif shahar sayyohlar bilan gavjum. Xususan, Buxoro viloyati Turizm boshqarmasidan olingan ma’lumotlarga ko‘ra, Eron, Italiya, Rossiya, Fransiya, Gretsiya, Azarbayjon, Gruziya, BAA kabi davlatlardan kelgan ko’plab mehmonlarni uchratish mumkin.

Chet ellik yoshu qari sayyohlarimiz marshrutidan asosan, Poyi Kalon majmuasi, Labi Hovuz ansambli, Nodir Devonbegi, Sitorai Mohi Xossa saroyi, Bahouddin Naqshband ziyoratgohi hamda boshqa tarixiy qadamjolar, shuningdek, hunarmandchilik markazlari joy olmoqda.

“— O‘zbekiston deganda ko‘z oldimda birinchi navbatda Buxoro gavdalanadi. Oilam bilan yurtingizga kelganimizga 5 kundan oshdi. Bu vaqt oralig‘ida Samarqand, Xiva va Buxoro shaharlarining diqqatga sazovor maskanlarida bo‘ldik. Buxoro — men yoqtirgan eng go‘zal shaharlardan biri” — italiyalik sayyoh.

Sharif shaharda buyuk allomalar qoldirgan meros, tarixiy obida va muqaddas qadamjolar qadimiyligi va maftunkorligi bilan ko‘p sonli xorijiy sayyoglarni o‘ziga jalb qilib turishi esa ajablanarli emas, albatta.