G‘ijduvonda gastronomik festival o‘tkazildi

G‘ijduvon tumanidagi “Qo‘rg‘on‘” turizm mahallasiga qarashli “Yoshlar bog‘i” alleyasida milliy qadriyatlarimiz, urf-odatlarimiz va hunarmandchilik an’analarini keng targ‘ib etish maqsadida “G‘ijduvon kulolchiligi va pazandalari” gastronomik festival tashkil etildi.

Mazkur festival viloyatimiz mehmonlari, xorijiy sayyohlar hamda mahalliy aholi uchun Buxoroning boy madaniy merosi, milliy hunarmandchiligi va pazandachilik san’ati namoyish etildi.

Festival doirasida kulolsozlar, kashtado‘zlar va boshqa hunarmandlarning mahorat darslari, yosh suratkashlarning ko‘rgazmalari va ayniqsa, milliy folklor jamoalarning sahna chiqishlari festival ishtirokchilariga xush kayfiyat bag‘ishladi.

Eng quvonarlisi, mahoratli pazandalarimiz tomonidan 54 metrlik ulkan shashlik tayyorlanib, festival mehmonlariga ulashildi.

Tadbir davomida G‘ijduvonning mashhur kulolchilik maktabi va milliy taomlari mehmonlar tomonidan katta qiziqish bilan qarshi olindi. Festival Buxoroning sayyohlik salohiyatini yana bir bor namoyon etilib, mahalliy va xorijiy mehmonlarda ulkan taassurot qoldirdi.