“Buxoro” futbol klubi Sherzod Esanov bilan shartnoma imzoladi

“Buxoro” futbol klubi tarkibi yana bir iqtidorli futbolchi bilan to‘ldirildi. Jamoa safiga professional faoliyati davomida mahalliy va xorijiy klublarda to‘p surgan futbolchi Sherzod Esanov qo‘shildi.

Ma’lumot o‘rnida, Sherzod Esanov shu kunga qadar O‘zbekistonning “Chig‘atoy”, “Andijon”, “Olimpik” jamoalari, shuningdek Rossiyaning “Akron” hamda Belarusning “Dinamo Brest” klublari sharafini himoya qilgan.

Yangi futbolchining jamoaga qo‘shilishi “Buxoro” tarkibida raqobatni oshirish, o‘yin sifatini yanada yaxshilashga xizmat qilishiga ishonamiz.

“Buxoro” futbol klubi Sherzod Esanovga jamoa safidagi faoliyatida omad, mustahkam sog‘liq va yorqin g‘alabalar tilaydi.

Qayd etish o‘rinliki, bir necha kun oldin futbolni rivojlantirish masalalariga bag‘ishlangan tanqidiy yig‘ilish bo‘lib o‘tdi.

Yig‘ilishda viloyat sport boshqarmasi rahbariyati, barcha sport ta’lim muassasalari vakillari, viloyat futbol assosiatsiyasining mas’ul xodimlari, shuningdek, tuman va shahar hokimlari o‘rinbosarlari ishtirok etdi.

Unda hududlarda futbol bo‘yicha seleksiya ishlarini jonlantirish, musobaqalar sonini ko‘paytirish orqali iqtidorli yosh futbolchilarni aniqlash va saralab olish masalalari atroflicha muhokama qilindi.

Shuningdek, musobaqalarda yuqori natijalarni qayd etgan jamoalarni rag‘batlantirish tizimini takomillashtirish, chet el futbol klublari bilan hamkorlik aloqalarini yo‘lga qo‘yish bo‘yicha muhim vazifalar belgilab olindi.

Yig‘ilish yakunida mas’ullarga hududlarda futbolni ommalashtirish, infratuzilmani yaxshilash hamda natijadorlikni oshirish bo‘yicha aniq topshiriqlar berildi.