Avtobusda pul bermaysiz: Buxoroda yangi tizim joriy etiladi

Buxoro shahrida jamoat transportida yo‘l kira haqini naqd pulsiz to‘lash tizimini joriy etish bo‘yicha hokim qarori qabul qilindi. Bu haqda Buxoro viloyati hokimligi tomonidan ma’lum qilindi.

Viloyat hokimining 2026-yil 24-yanvardagi 30-2-0-Q/26-sonli qaroriga muvofiq, shahar jamoat transportida to‘lovlar bosqichma-bosqich elektron shaklga o‘tkaziladi.

Amaldagi yo‘l kira haqi

• Buxoro shahar avtobuslarida — 3 000 so‘m
• ATTO elektron to‘lov tizimi orqali to‘langanda — 2 000 so‘m (rag‘batlantiruvchi chegirma bilan)

Naqd pulsiz to‘lovni joriy etish bosqichlari

1-bosqich — 2026-yil 1-fevraldan quyidagi yo‘nalishlarda:

• 1-sonli “Buxoro ASHB – Zarmanoq”
• 2-sonli “Buxoro ASHB – Sitora bozor”
• 5-sonli “F. Xo‘jayev MFY – To‘qimachi bosh bekati”
• 10-sonli “Alpomish ko‘chasi – Shayxon MFY”
• 17B-sonli “Chorbakr bosh bekati – Aeroport”
• 19-sonli “Karvon bozori – Karvon shopping”
• 33-sonli “Trikotaj fabrikasi – Mohi-Xossa sanatoriysi”

2-bosqich — 2026-yil 1-apreldan boshlab shahardagi qolgan barcha avtobus yo‘nalishlarida yo‘l kira haqi faqat naqd pulsiz shaklda amalga oshiriladi.

Mazkur tartib jamoat transportida hisob-kitoblarni soddalashtirish, xizmatlar sifati va shaffofligini oshirishga qaratilgan.

Naqd pulsiz to‘lovning jamoat transportidagi afzalliklari

Naqd pulsiz hisob-kitob jamoat transportida birinchi navbatda yo‘lovchilar uchun qulaylik yaratadi. Yo‘l haqi tez va aniq to‘lanadi, ortiqcha mayda pul izlashga hojat qolmaydi. Bu avtobuslarning bekatlarda turib qolish vaqtini qisqartirib, harakat jadvaliga rioya etilishini yaxshilaydi.

Elektron to‘lovlar shaffoflikni ta’minlab, noqonuniy tushumlarning oldini oladi. Haydovchilar uchun ham pul sanash va saqlash bilan bog‘liq xavflar kamayadi. Yo‘lovchilar esa to‘lovlar tarixini kuzatish imkoniga ega bo‘ladi. Bundan tashqari, chegirma va bonuslar joriy etilishi jamoat transportidan foydalanishni yanada rag‘batlantiradi.

Umuman olganda, Buxoroda to‘liq ko‘rinishda 2026-yilning 1-apreldan joriy etiladigan naqd pulsiz tizim shahar transportini zamonaviy, xavfsiz va samarali qilishga xizmat qiladi.