Sobiq yuqori lavozimli ichki ishlar mansabdorlari tergov ostida: Bekmurod Abdullayev va Rustam Tursunov ishi

Kuni kecha O‘zbekiston Ichki ishlar vazirining sobiq o‘rinbosari, general-mayor Bekmurod Abdullayev qamoqqa olingani haqida ma’lumotlar tarqaldi. Ushbu holat yuzasidan rasmiy idoralar soat 09:00 holatida hozircha izoh bermadi.

Ichki ishlar vazirligi matbuot xizmati mazkur masala bo‘yicha tergov harakatlari O‘zbekiston Respublikasi Bosh prokuraturasi tomonidan olib borilayotganini ma’lum qildi. Bosh prokuratura vakillari esa hozircha ushbu ish yuzasidan rasmiy bayonot berishdan tiyilib kelmoqda, biroq qamoqqa olish holatini ham ochiq rad etmadi.

Hozirgi paytda Bekmurod Abdullayevga qaysi modda asosida ayblov qo‘yilgani rasman e’lon qilinmagan. Ma’lumot uchun, u 2021-yil aprel oyidan Ichki ishlar vaziri o‘rinbosari — Jamoat xavfsizligi departamenti boshlig‘i lavozimida faoliyat yuritgan va 2025-yil 3-noyabr kuni prezident farmoyishi bilan lavozimidan ozod etilgan edi.

Bir jinoyat ishi doirasida yana bir sobiq rahbar

Manbalarga ko‘ra, IIV huzuridagi Jazoni ijro etish departamenti sobiq boshlig‘i Rustam Tursunovga nisbatan ham tergov harakatlari olib borilmoqda va unga nisbatan ehtiyot chorasi sifatida qamoq qo‘llangan. Qayd etilishicha, u Bekmurod Abdullayev bilan bitta jinoyat ishi doirasida tergovga jalb qilingan.

Rustam Tursunov 2017–2018-yillarda Jizzax viloyati Ichki ishlar boshqarmasi boshlig‘i, 2018–2021-yillarda Navoiy viloyati IIB boshlig‘i lavozimlarida faoliyat yuritgan. 2021-yil fevral oyidan Jazoni ijro etish departamentiga rahbarlik qilgan va 2025-yil noyabr oyida, Bekmurod Abdullayev bilan bir kunda lavozimidan ozod etilgan.

Rasmiy ma’lumotlar kutilmoqda

Hozircha tegishli davlat organlari tomonidan sobiq mansabdorlarga nisbatan ochilgan jinoyat ishi tafsilotlari, ayblov mazmuni yoki yetkazilgan zarar miqdori bo‘yicha rasmiy axborot berilgani yo‘q. Shu sababli ishning aniq holati va yo‘nalishi jamoatchilikka hali ma’lum emas.

Prezident pozitsiyasi: murosasiz kurash

Mazkur holatlar fonida Shavkat Mirziyoyevning 2025-yil 26-dekabr kuni Oliy Majlis va O‘zbekiston xalqiga yo‘llagan Murojaatnomasida bildirgan fikrlari yana bir bor dolzarblik kasb etmoqda. Davlat rahbari korrupsiyaga qarshi kurash borasida shunday degan edi:

“Korrupsiya — islohotlarga xiyonatdir. Kim mansabidan qat’i nazar, qonunni buzsa, u albatta javob beradi. Bu borada hech kimga imtiyoz bo‘lmaydi.”

Ekspertlar fikricha, sobiq yuqori lavozimli amaldorlarga nisbatan boshlangan tergovlar qonun ustuvorligi va javobgarlik tamoyillarini kuchaytirish yo‘lidagi qat’iy siyosatning amaliy ifodasi bo‘lib xizmat qilmoqda.