G‘ijduvonda qurut ishlab chiqarish bo‘yicha ilg‘or mahalla

G‘ijduvon tumanidagi “Tavariyon” mahallasi bugun qurut tayyorlash orqali nom chiqarmoqda. Oddiy sut mahsulotidan tayyorlanadigan bu milliy taom bir nechta oila uchun barqaror daromad manbaiga aylangan.

Qurutning foydasi ko‘pchilikka yaxshi tanish. U jazirama issiqda chanqoqni bosadi, tanadagi suv va tuz muvozanatini saqlaydi, suyak va mushaklarni mustahkamlaydi. Temir, kalsiy, magniy va kaliyga boyligi sababli bolalar o‘sishi, tishlar sog‘lom bo‘lishida ham muhim o‘rin tutadi. Eng muhimi, qurut uzoq saqlanadi va har mavsumda xaridorgir.

Tavariyon mahallasida esa bu foydali mahsulot kichik, ammo samarali biznesga aylangan. Bahodir Tilavov sexida oyiga 6 tonnagacha, Mirali Boltayev tashkil etgan kichik korxonada esa 7 tonnagacha qurut ishlab chiqarilmoqda. Asliddin Boboxonov va Jamshid Saidov sexlarida ham har birida 5 tonnadan mahsulot tayyorlanib, bozorga chiqarilmoqda.

Mahalliy qurutlar shakli va ko‘rinishi bilan ham ajralib turadi: dumaloq, to‘rtburchak, uchburchak, rang-barang va bejirim. Bozorlarda bunday qurutlarga talab yuqori, savdo esa yil bo‘yi to‘xtamaydi. Natijada o‘nlab xonadon doimiy ish bilan ta’minlanib, turmush darajasi yaxshilanmoqda.

Bugun qurut tayyorlash bilan shug‘ullanayotgan kichik korxona egalari oyiga o‘rtacha 35 million so‘mdan ortiq daromad olayotgani aytilmoqda. Tuman mutasaddilari va mahalla faollari bu yo‘nalishni kengaytirish, yangi oilalarni jalb qilish bo‘yicha ko‘mak bermoqda.

Tavariyondagi bu tajriba shuni ko‘rsatadiki, milliy taomlar nafaqat an’anani saqlab qoladi, balki to‘g‘ri yo‘lga qo‘yilsa, barakali biznesga ham aylanishi mumkin.