AQSh Epshteyn ishi bo‘yicha yana 3 million sahifadan ortiq hujjatni oshkor qiladi

AQSh Adliya vazirligi (U.S. Department of Justice) juma kuni milliarder Jeffri Epshteyn ishi bo‘yicha tergov hujjatlarining yangi yirik qismini e’lon qilishini ma’lum qildi. Gap 3 milliondan ortiq sahifa hujjat, shuningdek 2 mingdan ziyod video va 180 mingdan ortiq tasvir haqida bormoqda.

Bosh prokuror o‘rinbosari Todd Blanchening aytishicha, materiallar “Epshteyn fayllari shaffofligi to‘g‘risidagi qonun” asosida oshkor qilinmoqda. Ushbu qonun bir necha oy davom etgan jamoatchilik va siyosiy bosimdan so‘ng qabul qilingan bo‘lib, hukumatdan Epsteyn va uning yaqin sherigi, sobiq hamkori Ghislaine Maxwellga oid barcha mavjud fayllarni ochishni talab qiladi.

Blansh matbuot anjumanida:

“Bugungi e’lon hujjatlarni aniqlash va tekshirish bo‘yicha keng qamrovli jarayon yakunlanganini anglatadi. Maqsad — amerikaliklar uchun shaffoflikni ta’minlash va qonunga rioya qilish”,
— dedi.

Nima uchun kechikdi?

Kongress belgilagan 2025-yilning 19 dekabri muddatidan kechikib, vazirlik yuzlab yuristlarni hujjatlarni ko‘rib chiqishga jalb qilganini bildirdi. Sabab — jinsiy zo‘ravonlik qurbonlarining shaxsini himoya qilish. Shu bois ayrim ma’lumotlar tahrirlangan yoki oshkor etilmagan.

Blanshning so‘zlariga ko‘ra, juma kuni e’lon qilinadigan video va tasvirlardan Maksvell bundan mustasno, boshqa barcha ayollarning shaxsi olib tashlangan. Ayrim materiallar esa hozirgi tergovlarga zarar yetkazishi yoki potensial qurbonlarning shaxsiy ma’lumotlarini ochib yuborishi mumkinligi sababli sir saqlanadi.

Vazirlik ma’lumotiga ko‘ra, tekshirilishi lozim bo‘lgan hujjatlar (takrorlari bilan birga) taxminan 6 million sahifaga yetgan.

Oldingi e’lonlar va bahsli jihatlar

Rojdestvo arafasida Adliya vazirligi allaqachon o‘n minglab sahifalarni — fotosuratlar, so‘roq stenogrammalari, qo‘ng‘iroqlar jurnallari va sud hujjatlarini e’lon qilgan edi. Ularning katta qismi avval ham ma’lum bo‘lgan yoki keskin tahrirlangan.

Bu hujjatlar orasida 1990-yillarda Donald Tramp Epsteynning shaxsiy samolyotida uchgani aks etgan parvoz jurnallari ham bor. Shuningdek, sobiq prezident Bill Klintonning bir nechta fotosuratlari ham qayta tilga olingan. Har ikki siyosatchi Epshteyn bilan bog‘liq jinoyatlarda ayblanmagan va voyaga yetmaganlarga nisbatan zo‘ravonlikdan bexabar bo‘lganini bildirgan.

Epsteyn va Maksvell ishi

Epsteyn 2019 yil avgustida Nyu-Yorkdagi qamoqxonada, voyaga yetmaganlarni jinsiy ekspluatatsiya qilishda ayblanib hibsda turgan paytda o‘z joniga qasd qilgan. U 2008–2009 yillarda Florida shtatida yengilroq ayblovlar bo‘yicha jazoni o‘tagan, biroq keyinchalik ish yana federal darajada qayta ko‘tarilgan.

2021 yilda Nyu-Yorkda federal sud hay’ati Gisleyn Maksvellni voyaga yetmaganlarni jinsiy savdoga jalb etishda aybdor deb topdi. U hozir 20 yillik qamoq jazosini Texasda o‘tamoqda va ayblovlarni inkor etadi.

Qurbonlar va ayblovlar

Epsteyn ishida boshqa shaxslarga nisbatan rasmiy ayblovlar qo‘yilmagan. Biroq uning qurbonlaridan biri — Virjiniya Roberts Giffri sud da’volarida Epsteyn uni 17–18 yoshida siyosatchilar, biznesmenlar va mashhur shaxslarga jinsiy aloqa uchun taqdim etganini aytgan. Ayblanganlarning barchasi buni rad etgan.

Ular orasida Britaniya qirolichasi oilasining sobiq a’zosi shahzoda Endryu ham bo‘lgan. U da’volarni inkor etgan bo‘lsa-da, kelishuv asosida da’voni noma’lum summa evaziga yopgan.

Giffri o‘tgan yili G‘arbiy Avstraliyadagi fermasida o‘z joniga qasd qilib, 41 yoshida vafot etgan.

Yangi e’lon qilinadigan hujjatlar Epsteyn ishiga oid eng yirik oshkor etishlardan biri bo‘lib, AQShda siyosiy, huquqiy va jamoatchilik muhokamalarini yana avj oldirishi kutilmoqda.

Jeffri Epshteyn kim va bu ishning qisqa izohi

Jeffri Epshteyn — AQShda tanilgan milliarder va moliyachi bo‘lib, u voyaga yetmagan qizlarni jinsiy ekspluatatsiya qilish va savdosi bilan bog‘liq og‘ir jinoyatlarda ayblangan. Uning ishi AQSh tarixidagi eng shov-shuvli jinoyat tergovlaridan biri hisoblanadi.

Epshteyn 2000-yillarning boshida boylar va siyosiy elita bilan yaqin aloqalari tufayli mashhur bo‘lgan. 2008 yilda u Florida shtatida yengilroq ayblovlar bo‘yicha kelishuvga erishib, qisqa muddatli jazo bilan qutulib qolgan. Bu holat keyinchalik jamiyatda keskin tanqidga sabab bo‘lgan.

2019 yilda Epshteynga nisbatan federal darajada yangi ayblovlar qo‘yildi. U Nyu-Yorkda hibsga olinganidan bir oy o‘tib qamoqxonada o‘z joniga qasd qilgan. Rasmiy xulosaga ko‘ra bu — o‘z joniga qasd, biroq voqea hanuz bahsli.

Epshteynning yaqin hamkori Gisleyn Maksvell qizlarni unga topib berishda yordam berganlikda ayblanib, 2021 yilda sud tomonidan aybdor deb topildi va 20 yil qamoq jazosiga hukm qilindi.

Ishning eng muhim jihati shundaki, qurbonlar Epshteyn orqali siyosatchilar, biznesmenlar va mashhur shaxslar bilan jinsiy aloqaga majburlanganini da’vo qilgan. Ko‘plab mashhur nomlar tilga olingan bo‘lsa-da, ko‘pchiligiga nisbatan rasmiy ayblovlar qo‘yilmagan.

So‘nggi yillarda AQSh hukumati Epshteyn ishi bo‘yicha millionlab sahifa hujjatlarni oshkor qilishni boshladi. Maqsad — jamoatchilik uchun shaffoflikni ta’minlash va qurbonlar haqiqatini to‘liq ochish.

Epshteyn ishi — boylik, hokimiyat va jazosizlik qanday qilib yillar davomida jinoyatlarni yashirishi mumkinligini ko‘rsatgan, AQSh jamiyatida chuqur iz qoldirgan voqea.