Ro‘zayi Ramazon oyida bajarilishi tavsiya etiladigan amallar

Diyorimizga oylarning sultoni — mehr-shafqat va saxovat ramzi bo‘lgan, Qur’oni Karim nozil qilingan, fazilati jihatidan boshqa oylardan afzal muborak Ramazon oyi kirib keldi. Ulamolarimiz bu oyni g‘animat bilib, uni ibodat, taqvo va xayrli amallar bilan o‘tkazishni tavsiya etganlar. Quyida Ramazonda bajarilishi maqsadga muvofiq bo‘lgan asosiy amallarni eslab o‘tamiz.

1. Qur’on o‘qish va tadabbur qilish

Ramazon — Qur’oni Karim nozil qilingan oy. Shu bois bu oyda Qur’onni ko‘proq tilovat qilish, ma’nolarini anglash va hayotga tatbiq etish nihoyatda savoblidir.

Payg‘ambarimiz Muhammad (sollallohu alayhi vasallam) har yili Ramazonda Jabroil (alayhissalom) bilan Qur’onni takrorlab o‘qir edilar (Imom Buxoriy rivoyati).

2. Nafl va tungi namozlarni ko‘paytirish

Ramazonda nafl ibodatlarni ko‘paytirishning fazilati ulug‘dir. Ayniqsa:

• Tahajjud namozi

• Avval (ishroq) namozi

• Chosht namozi

• Taroveh namozi

Tahajjud namozi — kechasi uyqudan turib o‘qiladigan nafl namoz bo‘lib, gunohlarning kechirilishiga sabab bo‘ladi.

3. Istig‘for va tavba

Ramazon — mag‘firat oyi. Shuning uchun bu oyda ko‘proq istig‘for aytish, chin dildan tavba qilish lozim. Payg‘ambarimiz (sollallohu alayhi vasallam) marhamat qilganlar:

“Kim Ramazonda iymon va ixlos bilan (ibodat qilib) savob umidida bo‘lsa, uning avvalgi gunohlari kechiriladi” (Imom Buxoriy va Imom Muslim rivoyati).

4. Sadaqa va xayriya qilish

Ramazonda muhtojlarga yordam berish, sadaqa qilish va zakot ado etish eng fazilatli amallardandir. Rasululloh (sollallohu alayhi vasallam) dedilar:

“Suv olovni o‘chirganidek, sadaqa gunohlarni o‘chiradi” (Imom Termiziy rivoyati).

Yana bir hadisda: “Albatta sadaqa o‘z egasini qabr issiqligidan saqlaydi. Sadaqa qiluvchi mo‘min Qiyomat kuni o‘z sadaqasi soyasida turadi” deyilgan (Imom Tabaroniy rivoyati).

Sadaqa turli ko‘rinishda bo‘lishi mumkin:

• Kambag‘allarga moddiy yordam

• Yetim va muhtojlarga oziq-ovqat berish

• Kasallarga yordam ko‘rsatish va boshqalar

5. Ro‘zadorlarni iftor bilan siylash

Payg‘ambarimiz (sollallohu alayhi vasallam) dedilar:

“Kim ro‘zadorni iftor qildirsa, unga ro‘zador olgan savob kabi savob beriladi, ro‘zadorning savobidan esa hech narsa kamaytirilmaydi” (Imom Termiziy rivoyati).

Bu amal jamiyatda mehr-oqibat va birodarlikni mustahkamlaydi.

6. Qadr kechasini ibodat bilan o‘tkazish

Qadr kechasi ming oydan yaxshiroqdir. Shu sababli bu kechani ibodat, duo va istig‘for bilan o‘tkazish juda fazilatlidir. Rasululloh (sollallohu alayhi vasallam) dedilar:

“Kim Qadr kechasini iymon va savob umidida o‘tkazsa, uning avvalgi gunohlari kechiriladi” (Imom Buxoriy va Imom Muslim rivoyati).

7. Salomatlikka e’tibor

Ramazonda sog‘lom ovqatlanish, saharlikni tark qilmaslik va me’yoriy dam olish muhim ahamiyatga ega. Payg‘ambarimiz (sollallohu alayhi vasallam) marhamat qilganlar:

“Saharlik qilinglar, zero saharlikda baraka bor” (Imom Buxoriy va Imom Muslim rivoyati).

8. Ko‘p duo qilish

Ramazon — duolar qabul bo‘ladigan oy.

Payg‘ambarimiz (sollallohu alayhi vasallam) dedilar:

“Uch kishining duosi rad etilmaydi: ro‘zadorning duosi, odil hokimning duosi va mazlumning duosi” (Imom Termiziy rivoyati).

Quyidagi duoni ko‘p aytish tavsiya etiladi:

اللَّهُمَّ إِنِّي أَسْأَلُكَ الْعَفْوَ وَالْعَافِيَةَ فِي الدُّنْيَا وَالْآخِرَةِ

O‘qilishi: “Allohumma, inniy as’aluka al-‘afva val-‘aafiyata fid-dunya val-axira”,

Ma’nosi: “Ey Alloh, Sendan dunyo va oxiratda afv va salomatlik so‘rayman”.

Ramazon — qalblarni poklaydigan, gunohlarni yuvuvchi, savoblar ziyoda bo‘ladigan muborak oydir. Ushbu oyni g‘animat bilib, har bir kunimizni ibodat va xayrli amallar bilan bezashga harakat qilaylik.

Manba: O‘zbekiston musulmonlari idorasi Buxoro viloyati vakilligi