“Toshkent – Dushanbe” yo‘nalishida ilk davlat avtobusi yo‘lga chiqdi

Ikki qo‘shni poytaxtni bog‘laydigan yana bir qulay yo‘l ochildi. “Toshkent–Dushanbe” xalqaro yo‘nalishida ilk davlat avtobusi reysi rasman yo‘lga qo‘yildi. Endilikda yo‘lovchilar xavfsiz, qonuniy va tartibga solingan xalqaro tashuv xizmatidan foydalanish imkoniga ega bo‘ladi.

Yangi qatnov yotoqli, uzoq masofaga mo‘ljallangan zamonaviy avtobusda tashkil etilgan. Safar o‘rtacha 15–17 soat davom etadi. Yo‘nalish “Toshkent – Sariosiyo – Dushanbe” markaziy vokzali orqali amalga oshiriladi. Bu esa yo‘lovchilarga qulay marshrut va aniq belgilangan manzilni taklif etadi.

Mazkur qatnov xalqaro yo‘nalish bo‘lgani sabab davlat chegarasidan o‘tiladi. Shu bois har bir yo‘lovchidan xorijga chiqish pasporti talab etiladi. Hujjatlar to‘liq va tartibda bo‘lishi safarni muammosiz o‘tishini ta’minlaydi.

Hozircha reyslar haftasiga ikki marta amalga oshiriladi:
Toshkentdan jo‘nash — seshanba va juma kunlari.
Dushanbedan qaytish — chorshanba va shanba kunlari soat 13:00 da.

Mutasaddilar yo‘lovchilarga yo‘l qoidalariga qat’iy amal qilish, chegaradan o‘tish tartib-qoidalarini oldindan bilib olish va safar hujjatlarini tayyorlab qo‘yishni tavsiya etmoqda.

Yangi yo‘nalish ikki davlat o‘rtasidagi transport aloqalarini mustahkamlash, savdo-iqtisodiy va madaniy hamkorlikni kengaytirish yo‘lida yana bir muhim qadam sifatida baholanmoqda.