Buxoro cho‘lida topilgan jasad: turkiyalik tadbirkor bilan bog‘liq sirli voqea tafsilotlari

Buxoro viloyatining Qorovulbozor tumanidagi sahro hududida topilgan jasad atrofida jiddiy savollar paydo bo‘ldi. Marhum Turkiya fuqarosi bo‘lib, O‘zbekistonga xizmat safari bilan kelgan 49 yoshli tadbirkor – Qodir Tunch ekani ma’lum bo‘ldi. U mamlakatimizga biznes uchrashuvlari o‘tkazish va hamkorlik shartnomasini imzolash maqsadida tashrif buyurgan.

Dastlabki ma’lumotlarga ko‘ra, tadbirkor yurtdoshlari bilan muzokara olib borgan, biroq uchrashuvlar kutilgan natijani bermagan. Oradan ko‘p o‘tmay, u bilan birga bo‘lgan shaxslar o‘rtasida katta miqdordagi mablag‘ni qaytarish masalasida keskin tortishuv yuzaga kelgan. Bu mojaro oddiy kelishmovchilik darajasidan chiqib, jiddiy to‘qnashuvga aylangan.

Tergovga oid dastlabki bayonotlarda aytilishicha, janjal avtomobil ichida, harakatlanayotgan paytda sodir bo‘lgan. Mushtlashuv kuchayib ketgach, haydovchi mashinani to‘xtatishga majbur bo‘lgan. Shu paytda tadbirkor og‘ir tan jarohatlari olgan va voqea joyining o‘zida hayotdan ko‘z yumgan.

Eng dahshatlisi esa hodisadan keyingi harakatlar bo‘ldi. Ma’lumotlarga ko‘ra, jasad katta yo‘ldan ichkariga olib kirilib, shoshilinch ravishda tuproq bilan ko‘milgan. Bu orada uning qarindoshlari bir necha kun davomida aloqa uzilgani sababli xavotirga tushib, bedarak yo‘qolgani haqida xabar bergan. Shundan so‘ng O‘zbekiston tarafi bilan birgalikda qidiruv ishlari boshlangan va olib borilgan tezkor-qidiruv tadbirlari natijasida jasad topilgan.

Buxoroisharif.uz aniqlik kiritgan ma’lumotlarga ko‘ra, jasadni 2025-yil 17-oktabr kuni mahalliy cho‘pon topgan, dastlabki ekspertiza xulosalariga ko‘ra, u pichoqlab o‘ldirilgan. Shundan so‘ng ushbu shaxsnining kim ekanligini aniq tasdiqlash maqsadida DNK namunalari solishtirilgan va O‘zbekistondan olingan namunalar marhumning farzandlaridan olingan namunalar bilan to‘liq mos kelgan.

Tergov davomida jinoyat izlari ijaraga olingan avtomobilga olib kelgan — transport vositasi Istanbulda yashovchi 51 yoshli Suat T. tomonidan ijaraga olingani, uning salonidan topilgan qon izlari esa marhumga tegishli ekani qayd etilgan.

Hozirda mazkur holat yuzasidan jinoyat ishi qo‘zg‘atilgan. Turkiya jamoat xavfsizligi boshqarmasi hamda Istanbul politsiyasi tomonidan 4 nafar gumonlanuvchilar ushlangani ma’lum qilinmoqda. Tergov harakatlari ikki davlat huquqni muhofaza qiluvchi organlari hamkorligida davom etmoqda.

Moliyaviy kelishmovchilikning asl sababi, mojaroning qanchalik rejalashtirilgani yoki kutilmagan janjal ekani kabi savollar hanuz ochiq qolmoqda. Huquq-tartibot idoralari voqeaning barcha tafsilotlarini aniqlash ustida ishlamoqda. Bu hodisa biznes munosabatlarida ishonch va huquqiy kafolatlarning naqadar muhim ekanini yana bir bor eslatdi.