Jondorlik bankir IIB, DXX va prokuratura o‘tkazgan maxsus tadbirda qo‘lga olindi

Buxoro viloyatida huquq-tartibot organlari tomonidan o‘tkazilgan tezkor tadbir natijasida bank tizimidagi mas’ul shaxsning noqonuniy xatti-harakatlariga chek qo‘yildi. Mazkur holat korrupsiyaga qarshi kurashish yo‘lidagi navbatdagi muhim qadam bo‘ldi.

Buxoroisharif.uz ga kelib tushgan ma’lumotlarga ko‘ra, Buxoro viloyati Ichki ishlar boshqarmasi, Davlat xavfsizlik xizmati va Bosh prokuratura huzuridagi Iqtisodiy jinoyatlarga qarshi kurashish departamentining Peshku tumani bo‘limi xodimlari hamkorligida tezkor qidiruv tadbiri o‘tkazildi.

Tadbir davomida Jondor tumanidagi bank filiallaridan birida muammoli kreditlarni undirish bo‘limida ishlovchi mas’ul xodimi o‘z xizmat mavqeidan g‘arazli maqsadlarda foydalanayotganligi aniqlandi.

Aniqlanishicha, ushbu mansabdor shaxs:

• Jondor tumanida yashovchi, 2001-yilda tug‘ilgan fuqaroning ishonchiga kirgan.
• Fuqarolik ishlari bo‘yicha Romitan tumani sudi tomonidan qarzdorligi sababli qo‘yilgan chet elga chiqish taqiqini yechib berishni va’da qilgan.
• Ushbu “xizmati” evaziga 200 AQSh dollari miqdorida pul talab qilgan.

Mansabdor shaxs kelishilgan pulni olayotgan vaqtida ashyoviy dalillar bilan qo‘lga olindi.

Buxoro viloyati IIB Axborot xizmati rahbari Ulug‘bek Shukurlayevning ma’lum qilishicha, mazkur holat yuzasidan gumonlanuvchiga nisbatan O‘zbekiston Respublikasi Jinoyat kodeksining quyidagi moddalari bilan jinoyat ishi qo‘zg‘atildi:

Hozirda tergov harakatlari olib borilmoqda.

Hurmatli buxoroliklar, kundalik hayotda yoki ish faoliyatida tamagirlik, mansab vakolatini suiiste’mol qilish va korrupsiya holatlariga duch kelganda, zudlik bilan 1002 ishonch telefonlariga murojaat qilishingiz so‘raladi.

Eslatib o‘tamiz: Pora berish ham, pora olish ham qonun oldida qat’iy javobgarlikka sabab bo‘ladi.