Buxorodagi “Muruvvat” uyida bayram tadbiri tashkil etildi

Ramazon hayiti va Navro‘z umumxalq bayramlari arafasida ezgulik va mehr-oqibat qadri yana bir bor yuksak namoyon bo‘ladi. Shu munosabat bilan bojxona organlariga biriktirilgan Buxoro “Muruvvat” nogironligi bo‘lgan bolalar uchun internat uyida bayram tadbiri tashkil etildi.

Unda Buxoro viloyati bojxona boshqarmasi mutasaddilari ishtirok etib, tarbiyalanuvchilarning holidan xabar olish va ular tomonidan tayyorlangan bayram dasturiga mehmon bo‘lishdi.

Tadbir davomida bolajonlar tomonidan kuy-qo‘shiqlar, sahna ko‘rinishlari hamda milliy an’analarimizni tarannum etuvchi chiqishlar namoyish etilib, yig‘ilganlarga bayramona kayfiyat ulashildi. Mehmonlar tomonidan tarbiyalanuvchilarga samimiy tilaklar bildirilib, esdalik sovg‘alari topshirildi.

Shuningdek, muassasada yaratilgan shart-sharoitlar, tarbiyalanuvchilarning ta’lim-tarbiyasi bilan yaqindan tanishilib, ularning har tomonlama qo‘llab-quvvatlanayotgani alohida e’tirof etildi.

Bunday e’tibor va g‘amxo‘rlik bolalarning qalbida mehr va ishonch tuyg‘ularini mustahkamlashi, ularni kelajakka dadil qadam tashlashga undashi shubhasiz.

Bayram tadbiri davomida bolalar va mehmonlar o‘rtasida samimiy muloqot muhiti shakllanib, quvonchli lahzalar barchaga birdek ulashildi. Bu esa mehr-oqibat va insonparvarlik qadriyatlarining amaliy ifodasi bo‘ldi.

Shu kabi tadbirlar ijtimoiy himoyaga muhtoj bolalarga doimiy e’tibor va g‘amxo‘rlik ko‘rsatish zarurligini yana bir bor eslatadi. Ularning har bir yutug‘i va quvonchi jamiyat uchun ham muhim ahamiyat kasb etadi.

Ayniqsa, bayram kunlarida tashkil etilayotgan bunday uchrashuvlar bolalarning ruhiy holatini ko‘tarish, ularni qo‘llab-quvvatlash va hayotga bo‘lgan ishonchini mustahkamlashga xizmat qiladi.

Kelgusida ham bu kabi xayriya tadbirlarini kengaytirish orqali mehr va saxovat muhitini yanada mustahkamlash, jamiyatda inson qadrini ulug‘lash muhim vazifa bo‘lib qoladi.