Turkiyada ham karantin choralari kuchaytirilmoqda

Turkiyada koronavirus yuqtirish holatlari ko‘payishi sabab karantin choralari kuchaytiriladi. Bu haqda prezident Rajab Toyyib Erdo‘g‘onning matbuot anjumanidagi nutqiga tayanib, «RIA Novosti» xabar berdi.

Ma’lum bo‘lishicha, «qizil» viloyatlarda komendantlik soati nafaqat yakshanba, balki shanba kunlari ham joriy etiladi. Turkiya bo‘ylab kundalik komendantlik soati 21:00 dan 05:00 gacha davom etadi.

Shuningdek, hukumat Ramazon ro‘zasi oyida cheklovlar kiritishga qaror qilgan. «Ramazon oyida mamlakatda jamoaviy iftorlik va saharlik o‘tkazishga cheklovlar qo‘yadi», — deya ta’kidlagan Erdo‘g‘on.

Ma’lumot o‘rnida, Turkiya SSV mart oyi boshida respublika xaritasini e’lon qilgan. Unga ko‘ra, viloyatlar to‘rt xil rang: ko‘k, sariq, to‘q sariq va qizil bilan belgilangan. 4 hafta o‘tgach, viloyatlarning aksariyati «qizil»ga aylangan.