Buxoroda faoliyat yuritayorgan sanoat korxonalari nechta? Statqo‘m ma’lumotlarni ochiqladi

Buxoro viloyat Statistika boshqarmasidan olingan ma’lumotlarga ko‘ra, 2026-yil 1-mart holatiga ko‘ra, Buxoro viloyatida faoliyat yuritayotgan sanoat korxonalari soni 3 341 taga yetdi. Mazkur ko‘rsatkich hududda sanoat sohasining izchil rivojlanib borayotganidan dalolat beradi.

Tahlillarga ko‘ra, sanoat korxonalari iqtisodiy faoliyat turlari kesimida turlicha taqsimlangan. Eng katta ulush oziq-ovqat mahsulotlari ishlab chiqarish sohasiga to‘g‘ri kelib, ushbu yo‘nalishda 746 ta korxona faoliyat yuritmoqda. Bu jami korxonalar sonining 22,3 foizini tashkil etadi.

Shuningdek, boshqa nometal mineral mahsulotlar ishlab chiqarish yo‘nalishida 529 ta korxona mavjud bo‘lib, ularning ulushi 15,8 foizga teng. To‘qimachilik sanoatida 306 ta korxona faoliyat ko‘rsatib, umumiy ulushning 9,2 foizini tashkil etadi.

Kiyim ishlab chiqarish sohasida ham 308 ta korxona faoliyat yuritmoqda va bu ko‘rsatkich 9,2 foizni tashkil qiladi. Bundan tashqari, mashina va uskunalardan tashqari tayyor metall buyumlar ishlab chiqarish yo‘nalishida 303 ta korxona mavjud bo‘lib, ularning ulushi 9,1 foizga teng.

Mutaxassislar fikricha, sanoat korxonalari sonining ortib borishi hududda ishlab chiqarish hajmining kengayishi, yangi ish o‘rinlari yaratilishi hamda iqtisodiy barqarorlikni ta’minlashda muhim omil hisoblanadi. Ayniqsa, mahalliy xomashyoni chuqur qayta ishlash va qo‘shimcha qiymat yaratishga qaratilgan loyihalar sanoat rivojiga ijobiy ta’sir ko‘rsatmoqda.

Kelgusida sanoatni diversifikatsiya qilish, yuqori texnologiyali ishlab chiqarishlarni yo‘lga qo‘yish hamda eksportbop mahsulotlar hajmini oshirish orqali Buxoro viloyatining iqtisodiy salohiyatini yanada mustahkamlash rejalashtirilmoqda.