Qiyomat kuni Allohning huzurida odamlarning eng yomoni ikkiyuzlamachi ekanini ko‘rasan

Abu Hurayra roziyallohu anhudan rivoyat qilinadi: Rasululloh sollallohu alayhi vasallam dedilar:

“Bir-biringizni yomon ko‘rmang! Bir-biringizga hasad qilmang! Ey Allohning bandalari, birodar bo‘ling!”.

Abu Hurayra roziyallohu anhudan rivoyat qilinadi: Rasululloh sollallohu alayhi vasallam: “Qiyomat kuni Allohning huzurida odamlarning eng yomoni ikki yuzlamachi ekanini ko‘rasan. U anavilarga bir yuz bilan, narigilarga boshqa yuzi bilan keladi”, – dedilar.

Shuningdek, quyidagi hikmatlar ham bor:

“Zinhor va zinhor badgumonlikdan yiroq bo‘ling. Chunki badgumonlik eng yolg‘on gapdir”.

“Bir-biringizni avramang”.

“Bir-biringizga hasad qilmang”.

“Bir-biringizni yomon ko‘rmang”.

“Bir-biringiz bilan raqobatlashmang”.

“Bir-biringizga qarshi turli yomon chora-tadbirlarni ko‘rmang”.

“Ey Allohning bandalari, birodar bo‘linglar”.

Abu Hurayra roziyallohu anhudan yana rivoyat qilinadi: Rasululloh sollallohu alayhi vasallam: “Dushanba va payshanba kunlari jannatning eshiklari ochiladi. Bas, Allohga biror narsani shirk qilmagan har bir bandani mag‘firat qilinadi. Faqat birodari bilan orasida dushmanlik bor kishigina bundan mustasno. Shunda: “Ikkisini oralarini isloh qilishguncha kutib turing” deyiladi”, – dedilar.

Abu Idrisdan rivoyat qilinadi: Abud Dardo roziyallohu anhu: “Men sizlarga nafl sadaqadan ham, nafl ro‘zadan ham yaxshiroq narsaning xabarini beraymi? Orani isloh qilish. Ogoh bo‘linglar! Yomon ko‘rish qiruvchidir!”, – dedi.

Abdulloh ibn Abbos roziyallohu anhudan rivoyat qilinadi: Nabiy sollallohu alayhi vasallam: “Uch narsa borki, o‘sha kimda bo‘lmasa, kimni hohlasa, undan boshqasi mag‘firat qilinadi: Allohga biror narsani shirk keltirmay vafot etgan odam, sehrgar bo‘lmagan yoki sehrgarga ergashmagan odam, o‘z birodariga hasad qilmagan odam”, – dedilar.

Manba: O‘zbekiston musulmonlari idorasi Buxoro viloyati vakilligi